Mapahiyumong midawat uban sa pagpasalamat ngadto kang Kuya Gov Edwin I. Jubahib ang liboan ka mga benepisyaryo sa programa sa gobernador nga gipaagi sa Department of Labor and Employment (DOLE).

Gipangunahan mismo ni Kuya Gov uban ni DOLE Field Office Chief Angelina Talingting ang laing hugna sa Tulong Panghanapbuhay sa Ating Disadvantaged/Displaced Workers (TUPAD) Payout kauban sa mga Board Members sama ni BM Nicandro "Nickel" Suaybaguio Jr., BM Francisco Remittar ug BM Popo Estabillo, mga representante sa PAGRO, mga DOLE livelihood director, mga TUPAD Coordinators ug uban pa. Kini gipahinabo sa DavNor gym niadtong Abril 20, 2023.

Balor P4,430 ang gidawat sa 1,100 nga mga benepisyaryong mag-uuma sa saging kinsa apektado sa Panama o Fusarium Disease. Kini agi’g bayad sa napulo ka adlaw nga pagtrabaho diha sa ilang komunidad sama sa pagpanghinlo ug pananom. Kahibaloan nga una nang nag-payout ang mga KAAGAPAY benefeciaries sa niaging bulan, tuig kasamtangan.

Gibutyag ni PD Talingting, kini kabahin sa mga programa ni Kuya Gov nga pag-ila ug pagtubag sa suliran sa unemployment rate ug livelihood assistance sa mga benepisyaryong nawad-an og kapanginabuhian.

Si Metchie Elevera usab, lumolupyo sa Panabo City, nagpaabot sa iyang pasalamat sa gobernador sanglit siya usa sa mga benepisyaryo nga naka-payout ubos sa maong programa.

"Pasalamat ko kay nakadawat ko sa amoang TUPAD. Dako kaayo’g tabang para sa amoa nga ingon-ani lang mi aron makapalit pud mi kung unsay among paliton. Ang gamitan namo sa among kwarta kay ipalit namo’g bugas, konsumo ug unsa ang wala sa amoang panimalay," sumala ni Elevera.

Samtang gibatbat sa gobernador ang tim-os niyang tingoha nga matag pamilya dili mabiyaan sa kalamboan pinaagi sa pagpatuman sa iyang mga programa labi na sa pagsuporta sa mga mag-uuma.

Mga corn seedlings, fertilizers, abuno ug uban pa, ang gitunol nga ayuda sa administrasyong Jubahib alang sa mga farmers.

"Mao ni atong mga programa nga naghatag og dakong tabang sa mga katawhan nga nanginahanglan kay wala tay undang sa pagpaningkamot. Ang tanang problema moabot man gyud sa capitolyo ug mao nang atong gipangitaan kung unsaon nato sa pagsulbad ang problema sa katawhan sa probinsya," matud ni Kuya Gov.

Writer/Photos: Lorna P. Tripoli

 

 

 

DavNor News