Gibanabanaang moabot sa 5,000 ka mga residente sa Lungsod sa Kapalong ang niduyog sa gipahigayong Walk for Peace palibot sa mga nag-unang kadalanan sa maong lungsod isip kabahin sa tinuig nga selebrasyon sa Kapalong Peace Day 2023, sa Maniki, Kapalong, Davao del Norte, niadtong Marso 31, 2023.

Gitambongan kini sa mga dagkong opisyal sa probinsya nga gipangunahan ni Governor Edwin “Kuya Gov” Jubahib, Mayor Maria Theresa Timbol, Vice Mayor Edgardo Timbol ug mga sakop sa Sangguniang Bayan, mga empleyado sa LGU Kapalong, mga barangay opisyales, mga kasundalohan, mga estudyante ug mga nagpakabanang yanong lungsoran. Kalakip niini, ang pagdagkot sa kandila ug ang pagpatik sa ilang palad agi’g suporta sa kalinaw.

Gisaysay ni Kuya Gov atubangan sa bagang duot sa katawhan ang iyang mga pagpaningkamot aron makab-ot sa probinsya ang insurgency-free province. Dugang niya, nga siya maningkamot aron masustenir ang natagamtamang kahapsay ug kalinaw sa probinsya pinaagi sa pagbubo og mga proyekto sa mga lugar nga kanhi gilomloman sa mga rebeldeng NPA.

“Giatubang nato ang mga pamilya sa atong mga kaigsoonan nga nag-NPA. Kuyog nato ang kasundalohan ug kapulisan para nga makignegosasyon sa ilaha. Ato silang giingnan nga ‘kung ideliver nato ang tanang services nga inyong gusto sama sa kalsada, eskwelahan, potable water, kuryente, health center, ug apil na ang mga balay nga inyong kapuy-an, ang inyo bang mga anak o inyohang bana, monaug ba?  O mobalik na sa sabakan sa atong gobyerno?’ Ang ubang pamilya hesitant nga motubag, pero as your Kuya Gov, pagbaba namo, ang atong mga munisipyo ug ang probinsya, nagbutang dayon mi ug budget para i-construct sa mga kalsada paingon sa mga kabukiran, paingon sa tagsa-tagsa ka mga sitio. Nagpatukod ta’g health center, eskwelahan, tubig, panginabuhian ug diha nagsugod ang pagsurender sa atong mga armado nga mga kaigsoonan nga dugay nang nakipag-away sa atong kasundalohan,” saysay ni Kuya Gov.

Isip pagpadayag sa iyang dakong suporta sa gobyerno, nipaambit si Datu Lito Sumingkil Sampag, ang kanhi opisyal sa mga walhong grupo, sa natagamtamang kausaban sa dagan sa iyang pamuyo samtang siya anaa na sa sabakan sa gobyerno kompara niadtong aktibo pa siya sa agresibong kalihokan.

“Karon nga nagunitan ug na-organize na sa gobyerno, sa atoang mayor ug sa atoang Kuya Gov, nga una na siyang motan-aw sa kabukiran kung unsa ang mga problema, karon ang mga tagapikas ug ang mga tawo sa Gupitan, subay sa akong monitoring wala na gyuy nabilin pa didto sa pikas. Tungod kay maayo ang pagpadagan sa atong gobyerno ug sa atoang kasundalohan. Maayo ang pagtratar ug maayo ang pag-engganyo sa atoang mga kasundalohan sa mga katribu aron mohatag kalinaw ug kahusay dinhi sa atoang probinsya,” matud ni Datu Sampag.

Nagpaabot sa iyang pasalamat kang Kuya Gov si Mayor Timbol, gumikan sa tim-os nga suporta niini sa iyang administrasyon, aron mamintinar gayud ang kahapsay ug kalinaw sa maong lugar. Gihataga’g dakong gibug-aton sa mayora ang pagpakuyanap sa hisgutanang kahapsay ug kalinaw sa iyang lungsod aron mopatik kini sa alimpatakan sa katawhan ilabi na sa mga kabataan. Gisaysay sab ni Mayor Timbol ang kahimtang sa Kapalong kaniadto sa dihang kusog pa ang kalihokan sa mga rebeldeng New People’s Army. Samtang gihingusgan karon sa mayor ang pagbatok kontra ilegal nga droga sa iyang lungsod labi na sa Brgy. Maniki kay wala pa kini gideklarang drug-cleared barangay.

“Balik tan-aw, ang dakong problema sa lungsod nga atong giatubang, problema sa insurhensya. Nga maoy nahimong babag sa pag-develop sa atong lungsod, paspas nga paglambo. Ikaduha nga problema nato ilegal nga droga. Mao na ang dakong problema nga nagpugong sa paglambo sa atong lungsod. Tungod sa pagtinabangay natong tanan, in June 2022, ang Davao del Norte gi-declare nga insurgency free. Dako’g kabahin ang lungsod sa Kapalong nga nakab-ot nato ni. Dili lang tungod sa mga opisyal kondili tungod sa atong tanan nga gusto gyud ta og kalinaw sa atong lungsod ug nakita nato paano nagpaspas ang paglambo sa atong lungsod. Apan ang atong giyera sa droga hangtud karon nagpadayon,” sumala ni Mayor Timbol.

Ang kasaulogan sa Kapalong Peace Day, pinasikad sa Municipal Ordinance No. 1025 nga gipasa niadtong tuig 2017.

Laraw karon ni Kuya Gov nga saulogon sa probinsya ang susamang Adlaw sa Kalinaw ug itakda kini sa petsa kung kanus-a nadeklara ang probinsya isip insurgency-free province.

Writer: Nestor H. Mata, Jr.
Photos: France Pepito, III

 

 

 

DavNor News