Nagkatigum ang mga nagkadaiyang pundok sa mga kababaihan alang sa pagselebrar sa 2023 National Women's Month nga gipahinabo sa DavNor Gym, Marso 22, 2023. Gitambongan sa mga empowered women sama nila ni Kapalong Mayor Maria Theresa Timbol isip maoy presidente sa One Davnor Association of Women, Nanay Nicolasa Diaz Alvarez Foundation Incorporated Chairperson Jane Maliwanag, Eva Estabillo sa RIC Tagum, Former City Mayor sa San Fernando, La Union Mary Jane Crisanto-Ortega, ug uban pa.

Panginabuhian ang gipaniguro ni Kuya Gov Edwin I. Jubahib sa mga kababaihan human gibutyag niini nga sa tuig 2023 dunay gigahin nga pondo ang probinsya alang sa naasoy'ng programa. Gitahasan niya si Mayor Timbol aron sa pagpatuman niini sa tanang women sector sa nagkadaiyang LGU.

"In support sa atong women dinhi sa probinsya nagsugod na ang atong livelihood programs. Si Mayor Tes, si Ate Tes ang in-charge ana. Siya ang nagpadagan sa atong women's livelihood program entire province ug duna na pud tay budget nga gi-allocate for this year para additional program sa tanang mga kababaihan," pagbutyag sa gobernador.

Samtang kantidad P20,000 cash iyang gitunol sa maong asosasyon alang sa pa-raffle ingo’g kabahin sa ilang mga prizes ug uban pang mga kalingawan nga nadawat sa mga kababainhan.

Gipasalig ni Gov Jubahib nga ubos sa iyang liderato pantay ang mga babae sa oportunidad, katungod ug serbisyo. Giila sab niya ang pwersa sa maong sektor nga dako ang nahatag nga kontribusyon sa kalamposan sa iyang administrasyon sama na lamang sa mga babaeng mayores sa Braulio E. Dujali, Kapalong ug New Corella nga nitabang kaniya sa pagtubag sa mga labing panginahanglanon sa iyang ginsakopan.

Ang maong kalihokan gitambongan sa One Davnor Association of Women, Provincial IP Women Federation, RIC Tagum, Kapalong Davao North Lady Eagles Club ug mga council of women sa nagkadaiyang lokalidad.

Writer/Photo: Lorna P. Tripoli

 

 

 

DavNor News