Sulti ni Governor Edwin “Kuya Gov” Jubahib nga epektibo gayud ang mga reporma, programa ug proyekto nga iyang gipatuman, hinungdan nga mipaubos pag-ayo ang ihap sa mga pobre sa probinsiya ilawom sa iyang pagdumala, bisan pa man taliwala sa hagit sa pandemya.

“Nalipay kaayo ko nga nahimong effective ang atong pagpaningkamot sa paghatud og serbisyo sa katawhan,” ingon ni Kuya Gov.

Sumala sa 2021 Full Year Official Poverty Statistics of Region XI nga gipagula sa Philippine Statistics Authority (PSA), ang Davao del Norte ang dunay pinakaubos nga gidaghanon sa katawhan nga kabus ang kahimtang sa kinabuhi sa mga probinsiya sa Davao Region.

Ang poverty incidence sa mga pamilya sa probinsiya mikunhod gikan 12.5 percent sa tuig 2018 ngadto sa 7.3 percent sa tuig 2021. Mas ubos pa kini sa kaysa sa tala sa Davao Region nga 11.9 percent.

Ang poverty incidence mao ang kadaghanon sa katawhan nga diin ang ilang kita ubos sa gitawag nga per capita poverty threshold kon poverty line. Kini mao ang minimum nga income nga gikinahanglan aron makapalit sa mga batakang panginahanglan sa pagkaon ug uban nga non-food requirements o mga panginahanglan sama sa pamiste, pabalay, plete, health ug edukasyon.

Tungod sa maayong performance sa probinsiya, gipaubos kini sa PSA ilawom sa Cluster 5, kon “least poor cluster” o dunay pinakaubos nga ihap sa mga pobre.

Lakip sa daghang kabag-ohan nga gihimo ni Kuya Gov ang DavNor KAAGAPAY program nga naghatag kasigurohan sa pagkaon kon food security, panginabuhian ug nagprotektar sa kinaiyahan; pag-abli sa kapin dosenang kadalanan, mga eskwelahan, health center ug labaw sa 600 ka pabalay nga nagpausab sa kahimtang sa mga tribo; Zero-Billing program ug uban pa nga nagpalambo sa kalidad sa panlawas sa mga kabus; Oplan Canal Bayanihan program nga mipakunhod sa insidente sa grabeng pagbaha sa lalawigan; ug ang programang pangkalinaw ug pangkalamboan nga mipukan sa problema sa insuhensiya probinsiya, hinungdan nga gideklara sa Armed Forces of the Philippines nga ”Insurgency-Free Province” ang Davao del Norte.

Ilawom sa pagdumala ni Kuya Gov, napalig-on ang pagpanguna sa probinsiya isip pinakaprogresibo nga lalawigan sa Mindanao. Apil sa nakuha niini nga mga award ang 2022 Seal of Good Local Governance (SGLG); “Beyond Compliant” Award sa 22nd Gawad Kalasag Seal for Excellence in Disaster Risk Reduction and Management; 3rd Most Competitive Province in the Philippines Award ug Most Competitive Province in VisMin Region sa tuig 2022; 2021 Governor of the Year Award; 2021 Most Liveable and Sustainable Province Award; 2021 Best in Government Covid-19 Pandemic Response Award; 2019 SGLG; 2019 Most Business-Friendly (MBF) Province in the Philippines; ug Overall 2nd Most Competitive Province in the Philippines sa tuig 2020 ug 2021.

Sulti ni Kuya Gov nga nakab-ot sa probinsiya kini nga mga kadaugan tungod sa panaghiusa ug “pagtinabangay sa gobyerno ug sa katawhan para sa malungtarong kalamboan.”