Tumong ni Governor Edwin “Kuya Gov” Jubahib ang mas paspas nga paghatud sa serbisyo, abtik nga pagresponde sa kalamidad ug paglambo sa imprastraktura sa pagpalit og mga bag-ong sakyanan ug heavy equipment sa probinsiya.
“Ang purpose niini mao ang paghatud ug mas maayong serbisyo sa katawhan ug paglambo sa imprastraktura sa Davao del Norte… para matubag nato ang mga serbisyo nga dugay nang gipaabot sa atong katawhan,” sulti ni Kuya Gov, atul sa gipahitabo nga ‘blessing’ sa 21 ka mga brand new nga mga serbis ug bug-at nga makinarya nga nagbalor og P208 million.
Ang bag-ong panon sa mga sakyanan ug heavy equipment milangkob sa duha ka heavy-duty rescue vehicle nga dunay crane; lima ka Ural Next heavy-duty rescue vehicle; usa ka crawler hydraulic excavator; usa ka crawler long-arm excavator; duha ka bulldozers; duha ka dump trucks; duha ka wheel-type excavator; duha ka 16-ft fuel tanker; ug duha ka 4-wheel drive pick-up.
Una nang gi-deliver niadtong Hunyo ang 24 ka 4x4 automatic pick-up; tulo ka 4x4 manual pick-up; ug pito ka 19-seater van-type lightweight truck nga mokabat ngadto sa P57.5 million.
Dugang sa gobernador nga gamiton ang mga ekwipo aron sa paghimo ug pagmintinar sa mga kalsada ug uban pang imprastraktura, samtang ang mga rescue vehicles giandam alang sa mas paspas nga pag-responde panahon sa kalamidad.
Ang mga back-hoe sab gitakda nga motabang sa dredging machine kon water master alang sa “desilting” operation sa mga dagkong suba ug kasapaan aron sa pagsolbad sa pagbaha.
Gitagtag ang mga pick-up sa mga board member ug mga opisina sa Kapitolyo aron dili sila maglisod sa paghatud sa mga serbisyo ngadto sa kabarangayan, samtang pipila sab ka mga munisipyo ang natagaan niini.
“Walay nay rason nganong dili maka-deliver og maayong serbisyo ang atong mga opisina sa Kapitolyo,” sulti ni Kuya Gov.
Gibutyag sa gobernador ang iyang tinguha nga mahatud ang 95 porsiyento nga mga serbisyo ngadto sa katawhan sa iyang ikaduha nga termino.
“Naningkamot ta nga sa atong second term unta 95 percent ma-deliver nato ang mga serbisyo para sa katawhan. Daghan na man ang atong mga accomplishment sa atong first term. Pero daghan pa pud ang wala pa nato ma-perform. Mao nga naningkamot ta nga mahimo nato kay di ta mosugot nga kining mga problemaha paaboton pa gihapon sa sunod katuigan aron sa katumanan sa pangandoy sa katawhan,” pamahayag sa gobernador.
Ang kwarta nga gipalit sa mga ekwipo gikan sa loan sa probinsiya, nga gidugangan sa pondo gikan sa Local Government Empowerment Program (LGEP) sa Department of Interior and Local Government (DILG), pinaagi usab sa tabang ni 1st District Congressman Pantaleon Alvarez. Nobags
