PULOS pasalamat ug puno sa kinasingkasing nga apresasyon ang giani gikan sa sobra traynta ka People’s Organization nga nakadawat na sa mga KAAGAPAY manok (KAwsa sa AGrikultura ug PAnginabuhian sa barangaY) niadtong Martes ug Huwebes (Mayo 18 ug 20).
Ang KAAGAPAY maoy “food security program” ni Gobernador Edwin “Kuya Gob” Jubahib aron masagubang ang kalisod dala sa COVID-19 nga pandemya nga naglakip sa pagtanom og gulayon, pagtanom og kahoy ug pagbuhi og manok nga gisuportahan sa TESDA, DOLE, DSWD ug ubang nasyonal nga mga ahensya.
“Dako gyod namong pasalamat nga nahatag ni Gob sa amoa nga kinasingkasing ug kinasingkasing pod namong gidawat kay gani ang iyahang mga staff naningkamot gyod, rain or shine nga mahimo ang amoang mga papers nga di na mi moadto pa sa layo kundili dire gyod gihatod sa amoang pultahan ang mga kaayohan sa gobyerno,” matod ni Guadalupe Timbal, presidente sa Purok 5 Katipunan, PC KAAGAPAY Farmers Association.
“Dako kaayo ko’g pasalamat in behalf sa akoang mga kauban ug sa barangay Katipunan nga naka-avail mi ani nga livelihood gikan kay Gob kay dako kaayo’g tabang sa amoang barangay ug sa katawhan nga naa sila’y alternatibong panginabuhian. Kuya Gob thank you very much og kami gyod ang unang naka-benepisyo sa programa ni Gob dire sa Panabo,” sulti ni Mary Jane Nieva, presidente sa Purok 2-B Katipunan, PC KAAGAPAY Livelihood Association.
“Dako ning tabang sa amoa taga Katipunan. . . Dako kaayong kalipay kay gitabangan mi sa pang-goberno ni Governor Edwin Jubahib. Magpasalamat ko sa Governor ug sa uban pang mga opisyales,” sulti sab ni Landrito Morales, 59 anyos ug membro sa Purok 5 Katipunan.
“Dako jud kaayo among pasalamat kay Kuya Governor Edwin Jubahib sa iyahang paghatag aning proyektoha kay dako kaayo ni siya’g ikatabang alang namong mag-uuma dire sa barangay Sonlon. . Hundred percent gyod amoang pagsuporta sa imoha Governor. Salamat sa imong proyekto,” pasalamat sab ni Christine Espinosa, president sa Purok 3 Sonlon KAAGAPAY Growers Association sa Asuncion.
“Nagpasalamat gyod mi kay Governor Jubahib tungod sa iyang programa nga KAAGAPAY nahatagan mi ug income ang among pamilya; tungod sa pandemic ang uban namo walay trabaho. Pasalamat mi Gob sa maong programa. . . Kabalo mi ni Gob nga siya motabang gyod. Positive mi kaayo ug among suportahan ang iyang programa,” matod sab ni Gilbert Langrisa, presidente sa Purok 2 Sonlon KAAGAPAY Chickens Growers Association.
Gawas sa tiglima ka manok matag membro, adunay tagduha ka kilo nga feeds ang gipadala para sa manok gawas pa sa libreng teknikal nga tabang gikan sa DavNor Provincial Veterinary Office. Human sa Panabo ug Asuncion, padayong ihatod ang mga KAAGAPAY manok sa IGaCoS (Mayo 25), New Corella (Mayo 27), Tagum City (Mayo 28), Carmen, Sto Tomas ug B. E. Dujali (Hunyo 8); San Isidro (Hunyo 10), ug Kapalong (Hunyo 15).
Tumong sa KAAGAPAY nga molungtad ang programa kay gawas sa manok duna sab isda (tilapia) sundan og kanding dayon baka aron matabangan ilabina ang marginalized sector sa katilingban.
