UNANG makadawat sa KAwsa sa AGrikulturA ug PAnginabuhian sa barangaY (KAAGAPAY) chicken ang organisado na nga grupo nga may andam nga kulongan para sa manok.

Kahinumduman nga niadtong Hunyo 2020, gilunsad ni Davao del Norte Gobernador Edwin Jubahib ang KAAGAPAY tungod sa nasinating lockdown dala sa COVID-19 aron matubag ang panginahanglan sa pagkaon.

“Kay naka-organize na mo, maoy gusto ni Kuya Gob nga tagaa’g una ang naay kulongan. Liboton namo ang tanan, i-validate. Bahala’g wala pa ang Certificate gikan sa DOLE, importante naa na mo’y na-submit nga papel. Buot pasabot naa na mo’y organisasyon bahala’g wa pa ma-proseso ang registration. Kung naa nang duha i-turnover namo ang mga manok, tig-5 kada isa ka tawo. Ang isa ka grupo 15 ka tawo ug maximum 30 ang isa ka PO,” pasabot ni KAAGAPAY Technical Working Group head Romulo Tagalo didto sa Barangay Mambing, New Corella.

Sugod Marso 2, gisugdan sa 9 KAAGAPAY teams ang community organizing sa New Corella ug Island Garden City of Samal diha sa matag purok kada barangay ingong Peoples’ Organization (PO) nga mahimong benepisyaryo sa mga manok-- ang ikatulong component sa KAAGAPAY.

“Ingon si Gob nga dili ni pwede ihatag nga mora lang magpailog og kendi. Kay seguradong kinsa’y makakuha kaonon lang dayon og dili mahimong sustainable ang atong programa og dili pod na maayo kay mora ta’g nagtudlo sa tao nga magiging tamad. Kinahanglan naa ta’y mekanismo nga ang tawo mahimong responsable sa pagtabang bahin sa food security sa ilang komunidad. Sa 300 million food packs dili makaya nga magsige og hatag sa katawhan kay naa pod ta’y laing panginahanglan. Atong hatagan og responsibilidad ang katawhan para food security sa iyang pamilya, sa iyang komunidad,” dugang pasabot ni Tagalo.

Ang PO adunay counterpart nga maoy mogastos sa pagkaon sa manok gawas pa sa kulongan. Human sa 1 1/2 hangtod 2 ka bulan nga pag-alima, ang probinsya gihapon ang “kumprador” nga adtoon ang gipadagko nga manok parehas sa KAAGAPAY gulay. Ibawas ang orihinal gibug-aton (atol sa paghatod) ug bayaran ang nadugang nga timbang sa manok. Kini aron mapadayon (sustainable) ang programa.

Duna sab laing mga benepisyo ang PO kay sa indibiduwal nga benepisyaryo og kini nasulayan nga epektibo didto sa Talaingod. Sanglit maghimo og Constitution and By-Laws ingon man mga palisiya ang matag PO, ang ilang regular nga panagtapok magpasuod sa mga miembro nga magpalig-on sa ilang panag-silingan gawas pa sa “negosyo” nga manok.

Ang PO community organizing magpadayon hangtod malibot ang 223 ka barangay og ma-organisar ang sobra 2,600 ka mga puroks sa tibuok Davao del Norte.

 

 

 

 

 

 

 

 

 

DavNor News