Samtang nagapadayon ang pagtukod sa mga balay alang sa tribung Ata-Manobo didto sa mga Sitio Mesolong, Brgy. Sto. Niño ug Nasilaban, Brgy. Palma Gil sa Lungsod sa Talaingod, laing mga Indigenous People (IP) Pabahay Project na usab ang gibubo sa National Housing Authority (NHA) ngadto sa Davao del Norte.

Ang matag proyekto gigahinan ug tag 20 milyon pesos sa NHA ug dugang 2 milyon pesos gikan sa Probinsyal nga Panggamhanan sa Davao del Norte aron mahatagan ug katumanan ang pangandoy sa mga pamilyang IP nga makabaton ug disente nga panimalay. Ang maong mga IP Pabahay Project tukuron sa mga musunod nga mga lugar: Brgy. Camansa, Asuncion; Sitio Camansi, Brgy. Florida, Kapalong; Sitio Lunao, Brgy. Sto. Niño, New Corella; Brgy. Datu Balong, San Isidro; ug Sitio Gatong, Brgy. Palma Gil sa Talaingod.

Katuyuan sa administrasyon ni Kuya Gov. Edwin I. Jubabib nga mahaw-as sa kalisdanan ang katawhang Dabaonon ilabi na gayud ang mga miyembro sa IP sa nagkalain-laing tribu sa probinsya ug ilang mabati ang pag-amoma sa gobyerno nga mao karon ang nahimong usa sa mga hinungdan nganong daghang mga rebelde ang nibalik na sa sabakan sa panggamhanan.

Dako ang pasalamat sa DavNor sa walay puas nga tabang sa mga ahensya sa nasyonal nga panggamhanan sama sa NHA aron mas dali niining mapadangat sa katawhan ang nagkadaiyang tabang ug paghimo sa mga lakang pangkalamboan. Malaumon ang Probinsyal nga Panggamhanan nga pinaagi sa daghang proyektong imprastraktura, social services, supisyenteng pagkaon, ug uban pa, mapakusog niini ang kompyansa sa katawhan sa ilang mga kaugalingon ug pagsalig sa panggamhanan.

 

 

 

 

DavNor News