Gipahingusgan ni Governor Edwin “Kuya Gob” Jubahib nga dili angay dugay-dugayon ang tabang nga angay ihatud ngadto sa mga nanginahanglan ug galisod, sama sa mga Indigenous People (IPs) nga dugay napasagdan.
“Kung mayroon tayong pagkakataon para sila matulungan ay bakit pa natin patagalin,” sulti ni Kuya Gob sa mga miyembro sa media, atul sa iyang pagbisita sa tribal housing project sa Sitio Mesolong, Sto. Nino, Talaingod, Davao del Norte.
Dunay 100 ka mga balay sa IPs ang kasamtangang ginatukod karon sa maong sitio nga nagkantidad og P20 million gikan sa National Housing Authority, samtang mitampo ang probinsya og P2 million alang sa labor ug land preparation sa maong proyekto.
Apan, ang maong pahayag sa gobernador maoy iyang tubag nga mipunting sa pangutana sa mga media kun nganong mikuot siya sa iyang personal nga bulsa aron matukod ang tribal housing sa Sitio Mondol, Gupitan, Kapalong, ning probinsya, alang sa mga tribu nga gikan sa Sitio Tapayanon.
Kahinumduman nga sariling kwarta ni Kuya Gob Edwin ang P13 million nga gigasto aron matukod ang 159 ka balay sa Sitio Mondol sugod sa bulan sa Nobyembre 2020, kay wala pa may budget alang sa maong proyekto.
“Ayaw ko nang hintayin pa ang isang taon para sila matulungan,” ingon ni Kuya Gob, dugang saysay nga usa pud kini ka paagi niya aron madasig ang private sector nga partner sa probinsya aron motabang pagtiwas sa proyekto.
Aron malikay sa pagpanghasi sa mga rebeldeng NPA, mibalhin sa Sitio Mondol, Barangay Gupitan, Kapalong ang kapin gatos ka pamilyang Ata-Manobo gikan sa Sitio Tapayanon.
Apil sa pabalay ni Kuya Gob ang pag-abli sa maayong kalsada sa maong lugar ug pagtukod sa eskwelahan aron sa maayong pagpangandam sa maayong kaugmaon sa mga kabataang tribu.
Gawas sa mga Sitio sa Mesolong ug Mondol, lain pang tag-100 ka mga tribal housing units ang kasamtangang ginatukod sa Sitio Nasilaban, Sitio Tibukag, ug Sitio Gatong, tanan sa lungsod sa Talaingod.
Sulti sa gobernador nga ginabubo karon sa gobyerno ang mga proyektong pabalay, panginabuhian, panlawas, kalsada, agrikultura ug uban pa, aron molambo ang kahimtang sa mga tribu ug aron dili na sila mabiktima pa sa pagpangilad ug pagpang-abuso sa mga rebeldeng New People’s Army.
Kini parte sa kampanya sa gobyernong Duterte alang sa ending local communist armed conflict (ELCAC), aron da-ugon ang kalinaw ug maluntarong kalamboan.
Kauban ni Kuya Gob nga mibisita sa pabalay sa IPS sa Sitio Mesolong sila DOLE-XI Regional Director Atty. Jason Balais, 56th IB chief Lt. Col. Norman Valdez ug DOLE- DavNor Provincial Chief Angelina Talingting. (Nobags)
