Mabungahon ang nahimong dayalogo tali ni Kuya Gov. Edwin I. Jubahib isip representante sa Probinsyal nga Panggamhanan sa Davao del Norte ug mga personahe sa Department of Social Welfare and Development - Davao del Norte Provincial Operation Office niadtong Huwebes sa hapon, Enero 13 sa Tahanan ng Punong Lalawigan sa Capitol Compound, Dakbayan sa Tagum.

Gilaoman nga karong tuiga makabalhin sa Capitol Compound ang buhatan sa DSWD-Davao del Norte aron mas mapadali ang transaksyon sa mga kliyente niini nga nanginahanglan ug hinabang nga dunay kalambigitan sa social services. Sa kasamtangan, anaa mahimutang sa Rabe Compound, Visayan Village, Dakbayan sa Tagum ang ilang buhatan.

Gikalipay gyud sa mga taga DSWD ang balita ni Kuya Gov. Daghan ang mga ahensya nga nagahatag ug serbisyong medikal ug sosyal ang anaa mahimutang sa kapitolyo ug kung mahiusa silang tanan mas dako kini ug tabang sa katawhan.

Gilangkoban ang dayalogo sa mga opisyal sa DSWD-Region XI gamit ang online video conferencing service ug sila personal nga girepresenta ni Blaissel Jane Fernandez ug mga kaubanan niini sa DSWD-Davao del Norte. Kauban ni Kuya Gov sila Provincial Social Welfare and Development Officer Rosalinda Rapista, Provincial Information Officer Mervin Jay Suaybaguio ug Social Welfare Officer Lanny Guinit.

 

 

 

DavNor News