Mapasalamaton nga gidawat ni Kuya Gov. Edwin I. Jubahib ang Php 10,683,060 nga bag-ong pondo alang sa Tulong Panghanapbuhay sa Ating Disadvantaged/Displaced Workers o mas nailhan sa pangalang TUPAD Program sa Department of Labor and Employment o DOLE, kaganihang buntag, Enero 6, 2021 sa Tahanan ng Punong Lalawigan, sulod sa Capitol Complex, Dakbayan sa Tagum.

Ang financial assistance nga personal nga gitunol ni Atty. Jason P. Balais, Director II sa DOLE XI, ang mahimong pondo aron ihatag nga sweldo sa mga benepisyaryo sa TUPAD program. Ang liboan nga benepisyaryo ubos sa emergency employment gilangkoban sa mga displaced, underemployed ug seasonal nga mga trabahante.

Matud pa sa Gobernador, dako kaayo ang mahimong tabang niini sa paghatag ug higayon sa mga katawhan nga makabaton ug trabaho ilabi na sa mga nawad-an ug panginabuhian tungod sa COVID-19 ug American Swine Fever o ASF.

Ang mga benepisyaryo makatrabaho dili moubos sa 10 ka adlaw apan dili mulampas sa 30 ka adlaw. Sila mutabang sa pag-implementar sa Agro-Forestry community projects sa probinsya sama sa pagtanom ug mga kahoy o reforestation sa mga ancestral domain ilabi na sa Lungsod sa Santo Tomas. Adunay mga kahoy nga gipatubo ang Probinsyal nga Panggamhanan nga andam na nga itanom. Dugang pa sa Gobernador, doble ang maayong epekto niini: makatrabaho ang katawhan ug mabalik ang katahom sa kinaiyahan.

Hugot ang pagtambayayong sa Probinsyal nga Panggamhanan sa Davao del Norte ug DOLE. Ug gani, gawas sa mga livelihood programs, anaa sa 43 hangtod 44 million ang nahatag sa DOLE sa probinsya ubos sa emergency employment programs sa milabay'ng tuig 2020 nga diin liboan sa mga Dabaonon ang nakabenipisyo.

Ang seremonyas sa pagtunol sa assistance gitambongan nila Kuya Gov., Provincial Administrator Engr. Josie Jean Rabanoz, Assistant Provicial Administator for Operations Engr. Ma. Hazel Zafra, Employment and Workforce Development Divison Head Gloria Pamugas ug mga kauban niining division heads sa APAO. Ang grupo sa DOLE gilangkoban nila Atty. Balais, Provincial Director Angelina Talingting (DOLE-Davao del Norte), Labor and Employment Officer Lalaine M. Apugan ug Community Facilitator Dave Andrei A. Villegas.

 

 

 

DavNor News