Korona ang gasa ni Cheyeenne Khishi Soo ngadto sa probinsya human niini nasungkit ang titulo nga Miss Teen Glam Philippines 2020, kagahapon, Disyembre 30, 2020, sa virtual grand coronation night sa prestihiyosong beauty pageant. Nahimong doble ang kadaugan kay nabitbit usab ni Mohaira Sanama ang korona isip Little Miss Teen Glam Philippines 2020. Si Soo ug Sanama ang mga representante sa Davao del Norte.

Mapasigarbohon ang designer ug Founder sa Musa Advocacy, Ms. Joy Soo, nga mismo ang iyang anak ang nisuot sa iyang ginama nga disenyo gamit ang musa fabric sa Davao del Norte ug gideklara nga reyna sa maong kompetisyon nga naghatag niini ug katungod nga mahimong representante sa Pilipinas kauban si Sanama sa pagahitaboong Little and Miss Teen Glam International 2021 sa nasud Thailand.

Malipayon si Ms. Joy Soo nga nahimong tulay ang MTGP aron mas mailhan pa ang Musa Fabric sa tibuok kalibutan. Ug gani, dako ang interes sa Australian Fashion Preview nga ipasundayag ang Musa. Kahinumduman nga nagmalampuson ang mga Musa Fashion Show ug Musa La Fiesta ni Ms. Joy Soo sa Davao del Norte niadtong Nobyembre nga gipakita sa kahanginan pinaagi sa PTV-Davao del Norte ug One DavNor Network maingon man ang MUSA: There's No Place Like Home sa bulan sa Disyembre karon usab nga tuig nga nagpasundayag sa mga manghahabi sa Musa ug ang Exclusive Distribution Launching sa mga nasud Japan ug Germany ingon man sa lokal nga market sa Metro Manila ug Zamboanga Peninsula.

Kini ang kauna-unahang MTGP nga korona sa DavNor. Ang First Runner Up nakuha ni Sherilyn Lalantan nga taga Isabela, Second Runner Up Ariane Abarides nga gikan sa Rizal, Third Runner Up Gehlee Dangca sa Las Piñas ug Fourth Runner Up Juriz Magan sa Ormoc.

Mao usab sa Little Miss Teen Glam Category, kini ang unang korona sa probinsya. Ang First Runner Up nakuha ni Jolie Meagan Narciso sa silingang probinsya nga Davao De Oro ug ang Second Runner Up ni Ehlisha Acuesta nga taga Isabela.