GUMIKAN sa walay undang nga pagtabang kanila, giisip ug gitawag sa mga Ata-Manobo sa Sitio Mondol, Gupitan, Kapalong, Davao del Norte si Gobernador Edwin “Kuya Gob” Jubahib ingong “Ginikanan” sa mga IP ug kabos.

Si Kapalong Mayor Maria Theresa Timbol gitawag sab nila nga “Mama.”

“Naa ko’y ikasukli kang Gob nga dako gyod kaayo sa iyang pagtabang namo dinhi sa Sitio Mondol. Pinaka-dako nga pasalamat. Giisip namo nga ginikanan siya sa mga IP, ginikanan sa mga kabos. Si Mayor Timbol sa lungsod sa Kapalong, mao na’y giisip nga Mama namo sa mga kabos kay siya gyod ang unang-una nakatabang namo dinhi sa Mondol gikan pa sa Tapayanon,” matod ni Datu Amado Bansing, ang tribal lider sa Sitio Tapayanon nga nanguna sa pagbalhin didto sa Sitio Mondol.

Matod sa lider nga primero nilang estorya ni Kuya Gob 120 lang ka pamilya ang interesado mobalhin apan mahimong 169 dihang nakita sa uban nga mahimong mas maayo ang ilang kahimtang.

“Sa una 120 karon miabot na ug 169 ka pamilya. Karong Sabado andam na sila, kursunada magbalhin dire sa Sitio Mondol kay ang mga tao didto sa Tapayanon kapoy daw magsige’g baktas ug kun dunay hinabang gikan sa ubos maoy kabaka (kabalaka) nila kining dalan nga perteng layoa,” pasabot ni Bansing atol sa pag-inspeksyon sa Provincial Engineering tem sa gihimong karsada padulong sa Sitio Mondol.

Bisan kung wala pa mahuman ang balay nga gipahimo ni Kuya Gob para sa ilaha, desidido ang mga IPs mobalhin matod sa Datu.

“Nasabtan namo, kaning balay nga wala pa nahuman ang mga tao ipa-temporary, ipatukod ug balay dire nga mga payag-payag. Ug tabangan mi ni Governor,” dugang ni Bansing nga kabalo mosulti ug makasabot sa pinulongang binisaya.

Ingong “sukli” sa kaayo sa Gobernador ug Mayor, gipasalig sa tribal leader nga andam silang mobantay para sa kalinaw ug kahusay.

“Andam mi magtabang. Ang tabang ni Governor ug Mayor suklian namo para makab-ot na ang kadaogan namo dinhi sa Mondol. Kab-oton namo ang kalamboan, kab-oton namo ang pagka-peaceful sa among gipuy-an. . Andam mi magtabang kung unsa’y ipakanaog nga maoy kalamboan namo, maoy sundogon namo,” saad sa mga IPs pinaagi ni Datu Bansing.

Hangtod ning pagsulat, tungod sa kanunay’ng ulan nahimong “kalbaryo” ang pag-abri sa karsada padulong sa Sitio Mondol.