GISUGDAN na ang “staking” o’ pagbutang sa mga usok timaan asa tukoron ang 100 nga balay alang sa mga Ata-Manobo sa Sitio Mesolong, Sto. Niño, Talaingod.
Kahinumduman nga niadtong Enero 27, 2020 gipangunahan ni Gobernador Kuya Gob Edwin Jubahib ug National Housing Authority (NHA) General Manager Marcelino Escalada, Jr. ang groundbreaking alang sa 300 ka mga balay nga tukoron para sa mga Ata-Manobo sa Sitio Nasilaban, Gatong ug Mesulong sa 2020.
Nalangan kini tungod sa pandemya.
“Nagpasalamat gyod mi’g dako nga nahatagan ani nga programa. Wala namo damha nga niabot ni nga dugay na namo gipangandoy. Kutob ra gyod mi sa pangandoy kay di man namo ni masungkit kung dili tungod sa atoang gobernador nga maabtikon ug matinabangon. Masa gyod kaayo, matinabangon gyod siya. Usbon nako, dakong pasalamat kay Kuya Gob kay gihatagan kami ug higayon nga makaambit ani nga programa,” matod ni barangay Kagawad Datu Dante Sibogan sa Sitio Mesolong nga nagsaad ila gyod ampingan aron dili dali maguba ug mahapsay ang ilang pagpuyo.
Iya sab gipanawagan ang iyang mga ka-tribo nga “nailad” sa propaganda sa New People’s Army.
“Ako lang ikaawhag sa mga igsoon nato nga sa New People’s Army nga mogawas na unta mo kay maayo kaayo ang programa sa atong Gobernador Kuya Gob Edwin Jubahib. Pagka-nindot gyod sa iyang mga programa karon. Gihataga’g pagtagad ang atong kaigsoonang Lumad dire sa Talaingod. Di gyod nato ika-lilong nga grabe ang pagsuporta ni Kuya Gob dire sa Talaingod. Bisan tuod gamay ra ni pero dako kaayo ang iyang pag-atiman. Giatiman gyod ta’g sakto. . . Ang atong gobyerno andam motabang unsa’y atong kinahanglanon, kung unsa’y atong mga problema. Manghinaut ko nga mogawas na mo. Perteng nindota sa panglantaw sa atong gobernador sa atong lungsod,” panawagan ni Datu Sibogan.
Bisan ang taga DavNor Provincial Engineering Office nga maoy gitahasan ni Kuya Gob sa maong programa mibati sab ug kalipay.
“Nabutang man ta sa public servant, ato gyod ning trabaho. . Pasalamat ko at least nakita nato mga Lumad dire ang project sa gobyerno makatabang sa ilaha. . At least dire puhon-puhon moasenso na ang baryo, naa ta’y makita,” matod ni Engr. Noel Ambrosio, ang project in-charge sa Sitio Mesolong.
Sa sinultihan nga Ata-Manobo ang “Balay Pig Imim’manan” nagkahulogan ug ‘Balay Pahinumdumanan’ sanglit dinhi magtapok ang tibuok IP pamilya, apil ang “extended family,” human sa usa ka adlaw nga buluhaton matod ni Dexter May-as, agriculturist sa lungsod sa Talaingod nga usa ka malampusong IP.
Gawas sa Talaingod, sa paghangyo ni Kuya Gob ang National Housing Authority mihatag sab ug P20 milyones alang sa 100 ka balay sa Kapalong IPs, P20 milyones alang sa 100 ka balay para sa Asuncion IPs, P20 milyones 100 ka balay para sa New Corella IPs sa ug laing P20 milyones 100 ka mga balay para sa Sto. Tomas IPs.
