TALIWALA sa pandemya sa COVID-19, gisagop sa mga kooperatiba sa Davao del Norte ang katuyoan sa KAwsa sa AGrikulturA ug PAnginabuhian sa barangaY kun KAAGAPAY, programa sa administrasyon ni Kuya Gob Edwin Jubahib nga naka-base balay aron sa pagpatungha ug pagkaon pinaagi’g pagtanom ug gulay ug pagbuhi’g hayop.
Kini ang gibutyag ni Engr. Humber Cabunoc, DavNor Cooperative Investment and Development Division Chief sa pagsugod pag-obserbar sa Oktubre nga Coop Month sa programang “Pakigsayod” sa Philippine Information Agency.
“Ang pag-drive sa coop di lang pagpangitag kwarta kundili ang pag-integrate sa ilang operations, ang concept sa KAAGAPAY. Kining atong mga coop pwede mahimong buyer sa gulay, pwede pod motanom ug gulay. Unique nga concept,” matod ni Engr. Cabunoc.
Gipasalamatan gayod ni Kuya Gob ang tabang sa mga kooperatiba samtang nag-atubang ang tibuok probinsya sa pandemya.
“Nasayon ang atong paghatag sa mga serbisyo ug pagpatuman sa mga programa ug proyekto tungud sa tabang sa atong mga coop. We are thankful that most of our coops remained strong in the midst of the pandemic. So, we have a million reasons to celebrate the continued dynamism of the cooperative movement in the province,” mensahe ni Kuya Gob ngadto sa mga DavNor kooperatiba atol sa “virtual launching” sa coop month.
Ang dagko ug gagmay’ng kooperatiba naggamit sa ilang “Statutory Funds” panahon sa krisis aron unang-una matabangan ang ilang mga miembro lakip na ang komunidad. Wala usab nila kalimti ang paghatag ug mga “ready to eat food packs” ngadto sa mga frontliners diha sa matag LGU gawas pa sa pagdonar ug mga tambal ug bitamina.
Nakadayeg pag-ayo si Kuya Gob sa aksyon sa mga DavNor coops ug iya sab gipasalig ang todo suporta ngadto kanila.
“Wala nato damha nga miabot si COVID-19 ug gikahadlokan nga mapagan ang atong pag-uswag. Bisan pa niini, wala kita mahadlok. Atong gipakita ang kalig-on sa atong pagdumala ug nahimo kitang modelo sa pakigbatok sa pandemya. Nanguna kita sa paghimo’g lakang aron mapugngan ang grabe nga pagkuyanap sa sakit, sama sa pagpatuman sa electronic contract tracing o QR Code... Hence, we pledge the all-out support and commitment of our administration to the development and growth of our cooperatives. We are doing everything to create the right environment for coops and businesses to flourish,” pasalig ni Gobernador Jubahib.
Kasamtangan ang Davao del Norte adunay 445 rehistradong kooperatiba ug bisan sa pandemya 277 niini ang operational (62%) samtang ang 168 (38%) naapektohan pag-ayo nga nagkinahanglan ug ayuda gikan sa lokal ug nasyonal nga mga ahensya.
