Sa wala pa niabot ang panahon sa tag-ulan, apil na sa plano ni Kuya Gov Edwin I. Jubahib ang desilting ug dredging sa mga sapa, kanal, bukana ug uban pa aron mapugngan ang pagbaha. Sugod ugma, gamiton na ang bag-ong ekwipo gikan sa Department of Public Works and Highways, ang “water master”, aron mudugang sa dredging machine nga kasamtangang nagakalot sa mga kasapaan sa probinsya.

Wala na nakasinati pa ug pagbaha ang daghang mga lugar sa Davao del Norte tungod sa makanunayong pagpabalik sa natural nga kalawmon sa katubigang bahin sa probinsya. Kini buot himuong malungtaron ni Kuya Gov kay ang baha dako kaayo ug negatibong epekto labi na sa mga mag-uuma.

Mapasalamaton si Kuya Gov nga ang probinsya sa Davao del Norte ang usa sa unang gipagamit sa “water master” sa DPWH. Plano usab sa probinsyal nga panggamhanan nga mupalit ug kaugalingong “water master” aron sa kanunay dili na makatagamtam pa ug pagbaha ang probinsya. Dugang ni Kuya Gov, padayon ang pagpananom ug mga kahoy sa probinsya ilabi na sa mga naupaw nga kabungturan aron sa pagpabalik sa kanindut sa kinaiyahan ug malikayan ang mga makalilisang nga katalagman.