Gipahitabo ang send-off sa grupo sa Probinsyal nga Panggamhanan sa Davao del Norte inubanan sa pwersa sa kasundaluhan ug kapulisan aron sa implementasyon sa Rice Buying Intervention nga diin ang probinsya mao ang mupalit sa mga ani nga humay sa mga mag-uuma. Ubay-ubay nga mga dagkong sakyanan ang dala sa grupo nga maoy sudlan sa mga humay nga mapalit sugod karong adlawa, Setyembre 21.

Gipakita sa tanang mga mayores sa Davao del Norte ang ilang dako ug hugot nga suporta sa aksyon ni Kuya Gob Edwin I. Jubahib aron mahatagan ug ayuda ang mga mag-uuma. Sa kasamtangan, anaa sa 10 pesos per kilo ang palit sa humay nga maoy hinungdan sa dakong kaguol sa mga mag-uuma.

Subay sa Rice Buying Intervention, paliton kini sa probinsya sa presyo nga 15 o 16 pesos per kilo depende sa klase. Andam usab nga mutabang ang mga lokal nga panggamhanan sa pagpangita ug pondo aron dugang tabang sa probinsya para sa mga mag-uuma.