Ang programang DavNor KAAGAPAY (KAwsa sa AGrikulturA ug Panginabuhian sa barangaY) Roadshow natapos sa Island Garden City of Samal karong adlawa, Agosto 19, 2020. Kini nga roadshow gipahitabo aron pormal kini nga masugdan ug opisyal nga mapaila-ila ang mga Barangay Extension Workers kon BEWs sa Lokal nga Panggamhanan.

"Naay tulo ka tumong si Kuya Gob maong namugna ning KAAGAPAY. Una, para atong probinsya mahimong Food Basket, kaduha para naay supesyenteng pagkaon sa lamesa ug ikatulo makahatag ug extra income sa pamilya", matud pa ni Executive Assistant II Wowie de Ramos atol sa iyang paghatod sa mensahe ni Kuya Gob Edwin I. Jubahib. Mapasalamaton sab ang Lokal nga Panggamhanan sa IGACOS tungod dakong tabang ang programa sa pag sustenar sa pagkaon ilabi na sa mga lumulupyong galisod sa ilang kinabuhi.

Sulod sa seremonya ang usa ka "forum" diin adunay higayon nga makapangutana ang mga kapitan sa barangay lakip na ang mga opisyales ug empleyado sa Lokal nga Panggamhanan bahin sa KAAGAPAY ug tagaan usab ug pagklaro sa Technical Working Group o TWG nga gipanguluhan ni Dr. Romulo D. Tagalo, Chairperson sa KAAGAPAY.

Mainiton nga gidawat sa mga taga-isla sa panguna nila Mayor Al David Uy inubanan ni Vice Mayor Richard Guindolman, mga myembro sa Sangguniang Panglungsod ug mga Punong Barangay ang DavNor KAAGAPAY.