Subay sa Sec. 187, Local Government Code of 1991, gipahigayon sa probinsiyal nga panggamhanan ang pampublikong pandungog (Public Hearing) sa munisipyo sa Asuncion ug San Isidro mahitungod sa kabag-ohan sa mga bayranan sa mga serbisyo ug produkto gikan sa probinsiya sa dili pa 'ni himoong ordinansa.

Karon ang ikaduhang adlaw, Agosto 18, nga pagbisita sa probinsiyal nga panggamhanan ngadto sa mga Local Government Units (LGUs) sa panguna ni Sangguniang Panlalawigan Hon. Roy Catalan, Chairman sa Committee on Ways and Means/Games and Amusement. Matud niya nga “long overdue” na ‘ni nga proposal tungod sa nagkadaiyang kakulian, labi na sa pag-abot sa krisis sa covid. Dapat daw nga 2018 pa ni ipatuman.

Apan iyang gipasiguro nga ginagmay lang ang ipahamtang nga mga bayranan (local fees and charges). Pipila sa mga kausaban nga nakalatid sa Revised Revenue Code ilalom sa Provincial Tax Ordinance No. 2017 - 001 ang mosunod:

Request Copies of Salary Loans, Medical/Phil Health benefits, Certificate of Employment for Provincial Government Employees (Sa Kasamtangan - P12.00/pc, Proposed - P20.00/pc)

Inspection Fee (Ocular Inspection Property Assessment) (Sa Kasamtangan - Libre, Proposed - P150.00)

Appraisal Fee (Sa Kasamtangan - Libre, Proposed - P150.00/property)

Plastic Table Rentals (Sa Kasamtangan - Libre, Proposed - P20.00/pc)

Vermicast (Sa Kasamtangan - Libre, Proposed - P300.00/sack)

Shipping Permit/Veterinary Health Certificate Of Pigs (50kg and above) (Sa Kasamtangan - Libre, Proposed - P30.00/head)

Gisuportaan sa mga nitambong nga mga barangay kapitan ug ubang mga personahe sa lokal nga panggamhanan ang nahitabong pakigpulong. Matud ni Barangay Igangon Kagawad Ruben Bacaron nga wala siyay supak niini tungod kay tama ug makatarunganon ang maong mga kantidad ug nagkinahanglan sa pinansiyal ang probinsiya aron mapatigayon ang mga proyekto niini.

Sumala pa ni Acting Provincial Treasurer Evelyn Espra nga usa ni ka pamaagi aron madugangan ang panudlanan sa probinsiya tungod sa pagkunhod sa koleksyon. Daghang mga proyekto ang nagkinahanglan ug dakong pondo labi na ang KAAGAPAY program ni Kuya Gob Edwin Jubahib nga maoy dakong tabang sa katawhan sa pagsagubang sa krisis sa covid. Bisan pa man ania sa pandemia, gipasalig niya nga kugihan gihapon ang mga Dabaonon sa pagbayad sa ilang mga obligasyon.

Magpadayon ang public hearing sa uban pang mga lungsod nga ginsakopan sa Davao del Norte hantud Agosto 27.