Ilusad ugmang adlawa sa Probinsyal nga Kagamhanan sa Davao del Norte ang Weight Loss Challenge, kuyog sa tulo pa ka mga aktibidades ubos sa Health and Wellness Program sa Kapitolyo.

Ingon ni Giovanni Gulanes, ang PG Department Head sa Provincial Sports and Youth Development Office (PSYDO), nga tumong sa Weight Loss Challenge ang kaayuhan sa pisikal ug mental na panglawas sa mga empleyado.

“Ang katuyuan jud aning weight loss challenge is para ang mga empleyado mabaskog ug mahimsog. Apil na ani ang mental health kay daghay naboryong karon. Na bored, so aside from getting fit physically, it also helps us psychologically,” sulti ni Gulanes.

Dugang niya nga kung physically fit and psychologically sound ang empleyado, kini moresulta sa mas maayo nga pagkaproduktibo sa trabaho, nga mao ang katuyuan sa pamunuan ni Kuya Gob Edwin Jubahib.

Ang Weigh Loss challenge apil sa mga aktibidades sa Health and Wellness Program nga ilusad sa Kapitolyo ugmang adlawa, nga milangkob sad sa Zumba, DavNor Capitol Cyclistss, ug pagbalik sa DavNor Runners.

Ang bag-ong programa sa pisikal nga kaarang hulip sa tinuig na Capitolympics, nga giapilan sa lain lain nga departamento ang mga naka linya nga aktibidades.

Aron mokwalipikar sa Weight Loss Challenge, kinahanglan sa matag partisipante, ma pa Individual o Group category, nga mutimbang ug 60 kilograms pataas.

Sumala pa ni Gulanes na sa matag kilo nga mabawas, makadawat ug P300.00 ang mga partisipante kon asa ang P200.00 gikan sa PSYDO unya ang P100.00 gikan kay Kuya Gob tungod nalipay siya nga ang iyang mga empleyado mosalmot niini.

Duna sab premyo nga P15,000.00, P10,000.00 ug P5,000.00 alang sa group na category.

“Gituyo nato ni na 100 days ang duration because ingon pa sa mga pagtulun-an nga kung maghimo daw ka sa usa ka butang ika-baynte uno ka higayon, it becomes a habit. So it’s really a habit formation and you have to change your perception and behavior. Dili lang ni about pagpasingot, dili lang ni kabahin nga naa kay premyo apan atong usbon ang atong paradigm, ang atong behavior kay ang gusto jud sa atong pinalanggang Gobernador nga dapat panahon sa Covid we have to strengthen our immune system,” pagtapos ni Gulanes.

 

 

 

DavNor News