Gipailawom dayon sa strict quarantine protocol ang Barangay Cagangohan sa Panabo City aron malikayan ang pagkuyanap sa African Swine Fever (ASF) sa ubang lugar sa probinsya sa Davao del Norte.

Dali-daling gipulong kagahapon ni Kuya Gov. Edwin I. Jubahib, kauban si DA-XI Regional Director Ricardo M. Oñate Jr. ug Mayor Jose Relampagos, ang mga opisyales ug residente sa Barangay, human nga nagpositibo sa virus ang 12 ka mga baboy sa lugar.

“Gi-lock down nato karon ang hog industry sa Barangay Caganguhan aron malikayan ang pagkuyanap sa ASF sa kasikbit nga mga barangay ug ubang lugar sa atong probinsya,” pasabot ni Kuya Gob sa mga residente.

Lakip sa lockdown ang pagbawal sa paggawas ug pagsulod sa buhing baboy og karne sa mga boundary sa barangay, aron masiguro nga dili makalusot ang ASF sa kasikbit nga mga barangay.

Gimando sa gobernador nga sugdan dayon ang pagdakop sa tanang mga baboy sa barangay, uban sa pasalig nga makadawat ug hinabang ang mga apektadong lumulupyo.

“Ang tanang baboy diri sugdan na’g dakop. Pero bayaran mo,” sulti ni Kuya Gob.

Ang baktin bayaran og P2,000 samtang ang pwede na maihaw ug mga dagko bayran og P8,000.

Bisan dili makaapekto sa tawo ang makamatay nga sakit sa baboy, mipahimangno ang gobernador nga pakusgan pa ang pagbantay sa mga quarantine checkpoints batok sa ASF.

Aron tabangan ang apektadong mga residente, hatagan sila ni Kuya Gob ug mga bisayang manok nga ilang alimahon, samtang maghulat kanus-a mawala ang virus.

Gawas sa hinabang nga ilang madawat, gibutyag sab ni Director Oñate nga pwedeng maka-loan ang mga hog raisers sa DA hangtud P30,000, aron makasugod sa laing panginabuhian ug makabawi sa ilang alakansi.

Walay interest ang maong loan ug mabayran kini sulod sa tulo ka tuig.

“Magtinabangay kita aron mapanalipdan ang hog industry sa Davao del Norte,” hangyo ni Onate.

 

 

 

 

 

DavNor News