ANDAM na nga mohatag serbisyo ang mga Mass Warning Sirens ug Flood Monitoring Cameras nga gitaod sa Sto. Niño, Talaingod, Brgys Katipunan ug Maniki, Kapalong, Sagayen, Asuncion, Pagsabangan, Tagum City ug sa New Corella pananglit modako na ang tubig-baha.
Bisan ang DavNor Disaster & Emergency Hotline 911 andam na sab motubag aron mohatag ug diha-diha nga impormasyon ngadto sa pinakaduol nga rescue unit alang sa tabang dili lang panahon sa kalamidad lakip na sa bisan unsa nga emerhensya.
“Sa 2018 twice na ta gibaha. Mao na ang rason naghimo ta ug ing-ani nga programa kining atong Flood Monitoring and Siren Warning System kay gina-expect gyod nato sa pag-abot sa panahon daghan kalamidad moabot dinhi. Importante gyod nga kamong tanan ma-secure gyod inyohang safety,” matod ni Gobernador Anthony del Rosario atol sa pag-inagurar sa Mass Warning Siren ug Flood Monitoring camera didto sa Sagayen, Asuncion Hulyo 25.
Gipasabot sab ni Gob AGR nga atol sa SONA ni Presidente Rodrigo Duterte, gibutyag niini nga prayoridad ang paghimo ug department of disaster kay sa Pilipinas daghan kaayo nga kalamidad ang moabot kada tuig.
“Gusto gyod nato nga as much as possible nga naay moabot nga kalamidad walay mahitabo sa atoang mga lumulupyo. Ang hangyo nako, please lang, sundon gyod ninyo ang instructions. Pag moingon sila nga panahon para mag-evacuate, bakwit pod mo. Kay dili lang kinabuhi ninyo ang gina-risk, bisan ang kinabuhi pod sa rescuer ug luoy kaayo kay dili pod nato gusto nga ang atong mga rescuers ilahang i-risk ang ilang kinabuhi tungod lang sa kagahi inyong mga ulo,” pasabot hangyo ni Gob AGR ngadto sa tanang Dabaonon.
Bisan si Asuncion Mayor Eurfracio “Yuri” Dayaday, Jr. naghangyo sab sa mga residente.
“Importante gyod aron malampuson ni nga programa kamong tanan mag-cooperate kay sayang kaayo kung dili mo mag-cooperate,” pasiugda ni Mayor Yuri nga kinahanglanon gayod ang pagsugot sa publiko.
“Duha lang ka punto ang akong isulti. Una, magpasalamat sa atong gobernador nga concerned siya sa atoang safety kay gibutangan gyod ta niya dire ug device nga makahatag nato’g warning kung adunay dakong baha. Ikaduha nga ato gyong suportahan kining programa. Ako lang ihangyo kaninyo pag mo-siren na gani mobakwit na ta. Dili na ta magpadugay-dugay, kay kung malumos na ta motawag mo kang gobernador kang mayor, kang kapitan, di mi makatabang ninyo kay di mi kabalo molangoy,” pasiugda abogadong mayor sa Asuncion dala pasiaw apan seryoso.
Gawas sa mga kagamitan, pursigido sab ang DavNor Provincial Disaster Risk Reduction Management Division nga edukaron ang katawhan pinaagi sa mga lectures ug simposyum aron makabalo unsa ang himoon panahon sa kalamidad.
Sa development agenda ni Gobernador Anthony del Rosario nga BEST PEOPLE, gihatagan niini ug dakong importansya ang kinabuhi bisan pa man sa milyones nga gasto sa mga kagamitan sanglit regular na nga bisita sa Davao del Norte ang tubig baha matag tuig.
