MGA SINAKONG BUGAS ug grocery ang gitunol sa probinsyal nga panggamhanan sa Davao del Norte isip diha-dihang tabang ngadto sa misurender pinangita nga lider sa Langilan-Manobo tribe niadtong Sabado, Hunyo 9 didto sa Sityo Nasilaban, Talaingod, Davao del Norte.

Dili lang pagkaon, gihikay na usab sa administrasyon ilawom ni Gobernador Anthony del Rosario ang mga kinahanglanon aron makadawat ug mga pagbansay sa panginabuhian ang tribo ni Datu Guibang ug maapil sa mapinadayonong programang Pantawid Pamilya kun 4Ps ug Comprehensive Local Integration Program (CLIP) alang niadtong mga rebelde nga mibalik sa sabakan sa balaod.

Ingong pagpakita sa iyang pagbalik sa gobyerno, sa usa ka tribal peace gathering niadtong Sabado, gitunol ni Datu Guibang ang iyang armas ngadto kang Brig. Gen Ernesto Torres, Jr. , commander sa 1003rd Infantry Brigade sa presensya ni Lt. Col Edwin Paredes, commander sa 56th Infantry Batallion nga gisaksihan sab sa mga 500 ka lider ug sakop sa tribu ug mga sundalo.

Kahinumduman nga sa sayong bahin sa tuig 1990s, milusad ug “pangayaw” si Datu Guibang Apoga ug mga kaubanan nga gitawag Salugpongan Ta Tanu Igkanugon (Unity for the Defense of Ancestral Lands) batok pwersa sa gobyerno ug mga security sa Alcantara & Sons (Alsons) nga nag-operate ug logging sa kabukiran sa Talaingod. Tungod niini nahimo siyang pinangita (wanted) gumikan sa maong salaod.

Gilantaw sa kadaghanan nga ang pagsurender ni Datu Guiban ug mga kaubanan maoy positibong lakang alang sa kalinaw ilabina sa bukirong bahin sa Talaingod.