PUNO sa paglaum, migikan ang trayenta’y dos ka mga Persons With Disabilities (PWDs) nga mga atleta sa Davao del Norte inubanan sa mga coaches ug staff aron mosalmot sa Philippine Sports Association of the Differently Abled (PHILSPADA) National Paragames gikan Mayo 12-19, 2018 didto sa Marikina City.

Niadtong Byernes, Mayo 11, mismong si Gobernador Anthony del Rosario ang nagpagikan sa mga DavNor PWDs atleta uban ang panghinaut nga magdala ug dungog alang sa probinsya sa ilang pag-uli.

Kini na ang ikaduhang higayon nga nagpadala ang DavNor ug mga PWDs atleta uban ang hugot nga suporta sa ilang pamasahe ug panginahanglan.

“The province of course is providing support for these athletes in the form of their uniforms, their transportation and other needs pag-abot nila sa Marikina. . .This is the second year. . madayon gyod ni, hopefully next years to come,” matod ni Gobernador Anthony del Rosario nga mituyo lang gyod paggahin ug panahon aron dasigon ang mga PWDs bisan pa sa iyang busy nga eskedyul.

Si Ricardo Biag, Jr, nga naka-medalya niadtong 2016 agresibo kaayo nga makadula na sab sila.

“Event nako, coach sa wheelchair basketball at the same time playing coach, tenpin bowling ug table tennis,” matod ni Jun Biag nga nagtug-an nga sa miaging Paralympic games niadtong 2016, 20 ka medalya ang ilang nadala sa pagpauli.

Ang DavNor PWDs atleta makigtigi sa mga dula nga goal ball, athletics, swimming, wheelchair basketball ug powerlifting.    

Sa laing bahin gibisita sab ni Gobernador del Rosario ang padayong Summer Sports Program sa DavNor. Nakigdula pa si AGR sa mga bata nga nag-enroll sa basketball clinic ug nakig-groufie sa mga kabataan nga gustong mahimong atleta sa ilang pagdako.

Ang DavNor Summer Sports Program maoy libre.