TUNGOD sa dakong danyos sa agrikultura dala sa El Niño, mipagawas ug resolusyon ang Provincial Disaster Risk Reduction and Management Council (PDRRMC) nga nag-awhag sa Sangguniang Panlalawigan sa pagdeklara sa probinsya sa Davao del Norte ubos sa state of calamity.
Human sa taas nga deliberasyon atol sa miting sa konseho sa PDRRMC, gipasabot ni chairperson Gobernador Rodolfo del Rosario ang kahinungdanon sa pagpasar sa resolusyon tungod sa sobra P883.5 milyones nga danyos sa pananom ug nag-apektar sa 57,244 ka pamilya sa tibuok probinsya.
Base sa Republic Act No. 8185, giduso sa konseho ang pagpasar sa resolusyon human nagsumiter ang mga Local Government Units sa Kapalong, Carmen ug Asuncion nga nagpahimutang sa ilang mga lungsod ubos usab sa State of Calamity human nga naigo sa taas nga hulaw.
Gisugyot sa konseho ang P11 milyones nga pondo aron mamenosan ang kadaot dala sa hulaw. Ang maong kantidad gamiton aron tabangan ang mga mag-uuma pinaagi sa libreng binhi, abono, semilya sa isda, medisina ug ingon man mga relief goods.
Sa taho ni Provincial Agriculturist Dr. Anastacia Notarte, moabot ngadto sa 36,449.45 ka ektaryas sa kaumahan ang nadaot sa El Niño diin 13,828 ka ektarya sa saging nga pang-export ang grabeng naigo sa kalamidad nga mokabat ngadto sa P408.6 milyones nga danyos.
Gawas sa sagingan, mokabat usab ngadto sa 6,809 ektarya sa kahumayan ang nadaot nga mokantidad ngadto sa P202.8 milyones walay labot sa ginatos ka milyon nga kantidad sa ubang tanom sa mais, lubi, gulay ug isdaan.
Labot sa sakit nga dala sa El Niño, mitaho ang Provincial Health Office nga miabot ug 7,593 ka kaso sa nagkalain-laing mga sakit ang natala nga naglakip sa Upper respiratory tract infections (URTI), kalibang, sakit sa panit, chicken pox, mumps ug amoebiasis nga bisan panahon ning pagsulat gidahom nga mosaka pa ang gidaghanon.
Gawas sa pagpagawas ug resolusyon alang sa pagdeklara sa tibuok probinsya ubos sa state of calamity, gihisgotan usab sa PDRRMC atol sa maong miting ang dakong pangandam nga himoon sa taliabot nga La Niña nga matod sa PAGASA mosunod human sa El Niño. (pioDavNor)
