‘Basta DavNor Sikat’ mi-arangkada na!
MI-ARANGKADA na ang “Basta DavNor Sikat” aron maka-diskubre, mapataas ug mapalambo pa ang lokal nga mga talento sa mga kabatan-onan sa Davao del Norte.
Gilusad Abril 13 didto sa Braulio E. Dujali, gidugok dayon kini sa mga batan-on nga nag-edad 13-21 anyos nga nagpakita sa ilang abilidad sa pagsayaw, kanta, ‘beatbox’ ug bisan pagmadyik. Human sa Braulio Dujali, mipadulong kini didto sa Panabo City ug Carmen sa distrito II. Pagka Myerkoles, Abril 18, didto na sab ang auditions gipahinabo sa New Corella sa distrito I sa probinsya.
“Gusto lang nako nga mahibal-an sa mga katawhan. . First time pa nako ni kay kasagaran nako nga ginaapilan sa mga barangays lang, kanang pahalipay lang ba. Gikulbaan gani ko atubangan sa camera,” matod sa 19-anyos nga taga Barangay Carcor, New Corella Michael Pancho nga nag ‘beatbox’ ug masaligon nga makuha alang sa quarterfinals.
Ang semi-finals ug finals pagahimoon sa semana sa pagtimaan sa Kadagayaan Festival sa probinsya nga matapos pagka Hulyo 1, 2018.
“Inyo jud maasahan sa akoa nga naa pa jud ko ibuga, more pa ani,” kumpyansang pahayag ni Michael Pancho nga nakadawat ug P5,000 ug nakasulod dayon sa quarterfinals.
Ang lungsod sa Kapalong maoy bisitahon Huwebes (Abril 19), dayon Sto. Tomas (Abril 20), IGACOS (Abril 24), Talaingod (Abril 25), Asuncion (Abril 26), San Isidro (Abril 28) ug Tagum City (Abril 30).
Gawas sa pagdiskubre ug pagpalambo sa mga talento, tumong sab sa Basta DavNor Sikat nga masuportahan ang kabatan-onan sa Davao del Norte, mapalayo sa illegal nga droga, paglig-on sa relasyon tali sa mga batan-on ug probinsyal nga panggamhanan, pagpataas sa pagsalig ug pagtahod sa kaugalingon ug aron makamenos sa galastohan sa pagsaulog sa Kadagayaan. Imbes magkuha ug daghang artista ug mga talento atol sa Festival, ang Basta DavNor Sikat mohulip pinaagi sa ilang mga talento nga ipakita sa publiko.
