NANAWAGAN ang Davao del Norte Tourism Officer nga angay motabang gayod ang komunidad ug ang turista mismo aron molungtad ang “DavNor Turismo” atol sa programang DavNor Sayron Ta! Martes, Marso 27.
Ilawom sa BEST PEOPLE development agenda ni Gobernador Anthony del Rosario, matod ni Provincial Tourism Officer Noel Daquioag nga tumong gayod sa kasamtangang administrasyon nga ang DavNor Turismo mahimong behikulo aron matabangan ilabina ang mga kabos duol sa tourism sites nga adunay dugang kinitaan.
Tungod niini gipasabot ni Daquioag nga gawas sa gipatuman nga mga regulasyon sa usa ka Local Government Unit angayan lang usab nga ang publiko mohimo sa iyang bahin ilabina sa kahinlo ug dili magdaot sa lugar aron kini molungtad sama sa Panas Falls sa New Corella.
“Basin karon i-implementar nila nga 500 lang ang pwede mosulod matag adlaw diha sa Panas Falls. Atong ginatan-aw nga sa kagamay pod sa mga tawo nga nagbantay diha di mahakop nila pagbantay ang 10,000 ka tawo; ang basura niana, naa pa jud uban nga mga not-so-friendly nga magbuhat pa ug vandalism. Akong hangyo sa atong mga tigpaminaw nga atong tabangan nga mahimong sustenable (sustainable) ang atong turismo,” pagtumbok ni Daquioag nga angay gayod i-regulate ang gidaghanon kay seguradong dugokon gayod kini ilabina karong bakasyon sa ting-init.
Dugang sa Provincial Tourism Officer nga sa kasamtangan ang probinsya aduna na’y Provincial Tourism Master Plan nga nakalinya sab sa National Tourism Master Plan sa nasod.
“More importantly, ang kakulangan nato sa una nga Provincial Tourism Master Plan anaa na karon. Mao ni mahimong “bibliya” nato sa turismo ug ato ni nga gipresentar sa tanan nga mga Local Government Units sa ilahang mga local development councils ug ilaha na kanang gi-adopt. So hopefully in the next ten years grabe gyod nga kalamboan ang mahitabo dinhi sa Davao del Norte,” dugang komento ni Daquioag nga malaumon sa positibong epekto sa turismo.
Giangkon hinuon ni Daquioag nga nunot sa tumong sa National Tourism Master Plan nga Improved competitiveness ug Enhanced growth, ang Davao del Norte daghan pa gayod ug kakulangan ilabina sa mga amenities. Kung bahin sa “human resource” ang probinsyal nga panggamhanan padayon nga nagpasiugda sa mga training alang sa pag-uswag sa katakos sa mga trabahante diha sa Turismo.
Di pa lang dugay gibutyag sa Davao del Norte Learning Institute-Davao del Norte State College (DNLI-DNSC) ang kurso sa turismo nga itanyag sa bag-ong bukas nga DNLI-DNSC Island Garden City of Samal campus karong tingbukas sa klase.
“Ang turismo actually is naa sa kultura sa Pilipino. Dali lang kaayo kung mosulti ug turismo, dali ra na kaayo para sa Pinoy. Ang Pinoy lang ang naay “golden heart” nga maayo moabi-abi sa mga bisita. Mao man na siya ang turismo, mao man na siya atoang alas!” dugang pasabot sa DavNor Tourism Officer nga dakong bentaha kung itandi sa ubang nasod.
