Malampuson nga nakapasar ang Probinsiya sa Davao del Norte sa gikaibgan kaayo nga 2022 Seal of Good Local Governance (SGLG) tungod kay nakab-ot niini ang tanang 10 ka krayterya sa award.

Sa “online announcement” nga gimantala sa Department of the Interior and Local Government (DILG) kagahapong adlawa, nasakmit sa probinsiya ang giila nga pinakataas nga pasidungog alang ngadto sa mga local government units (LGUs) nga mipakita sa sulundong kahimoan sa panerbisyo sa katawhan.

Ang bag-ong pasidungog misalamin sa kadaugan sa mga reporma ug maayong panggobyerno ilawom sa administrasyon ni Governor Edwin “Kuya Gov” Jubahib.

Gihanyag sa gobernador ang prestihiyosong award sa mga Dabaonon, samtang iyang gipasalamatan ang pagkamatinud-anon, kaligdong, katakus ug kakugi sa mga opisyales, ehekutibo ug mga kawani sa Kapitolyo sa paghatod sa mahinungdanong serbisyo ngadto sa katawhan.

“Akong ginahanyag kini nga award sa atong katawhan sa Davao del Norte. Nagpakita kini sa atong dedikasyon ug sinsero nga paningkamot aron molambo ang kahimtang sa atong katawhan ug alang sa pag-uswag sa atong ekonomiya,” sulti ni Kuya Gov.

Mao kini ang ika-pitong SGLG nga nadawat sa probinsiya gikan sa pagmugna sa maong award, nga kanhi gitawag nga “Seal of Good Housekeeping Award”.

Ang Davao del Norte maoy usa sa mga 18 ka mga probinsiya sa tibuok nasud nga nakadawat sa SGLG karong tuiga, samtang usa sab kini sa duha lamang ka mga probinsiya nga nakapasar sa Davao Region.

Nakapasar sab ang Island Garden City of Samal sa 2022 SGLG, nga maoy ginahatag nga pasidungog sa DILG, alang sa mga LGU nga nagpakita sa pagkamaunungon, katakus, ug maayong pagdumala sa ilang ginsakupan.

Kahinumduman nga niadtong tuig 2019, ang Davao del Norte lamang ang nag-inusarang probinsya sa tibuok Rehiyon Onse nga nakadawat sa prestihiyosong pasidungog.

Nahimong mas mahagiton ang pagkab-ot sa SGLG karong tuiga kay gikan sa pito nahimo nang napulo ang “Governance Areas” o “Assessment Criteria”.

Kini ang Financial Administration and Sustainability; Disaster Preparedness; Social Protection and Sensitivity; Safety, Peace and Order; Health Compliance and Responsiveness; Sustainable Education; Business Friendliness & Competitiveness; Environmental Management; Tourism, Heritage Development, Culture and the Arts; ug Youth Development. (Nobags)

 

 

 

 

 

DavNor News