Mokabat dos mil pesos cash (P2,000) ang malipayon ug mapasalamatong gidawat sa mga barangay health workers nga gipang-apod-apod Oktubre 14, 2022 sa Provincial Training Hall, Capitol, Mankilam, Siyudad sa Tagum.

Ang Department of Social Welfare & Development – Provincial Office maoy mitunol sa ayuda ug miila sa 317 ka mga benepisyaryo. Kahibaloan nga ang pondo nasungkit pinaagi sa buhatan ni BHW Partylist Representative Angelica Natasha Co ug pakig-alayon sa probinsyal nga panggamhanan ni Kuya Gov. Edwin I. Jubahib.

Giklaro ni Mikah Arcenal, Executive Assistant ug representante sa BHW Partylist nga ang pagpanghatag sa tabang pinansyal ilang gihimo alang sa mga BHW sa Davao Region, ingon man sa tibuok nasud niining panahon sa kalisud.

“Assisstance to individual in crisis situation so financial assistance po ito sa tulong ng ating pondo galing sa DSWD,” sulti ni Arcenal.

Gipasalig sa naasoy’ng partylist nga makanunayon ang ilang suporta ngadto sa mga BHW ilabi na sa pagpanday og balaudnon sa kongreso nga maghata’g benepisyo kanila.

“Maraming salamat po sa ating mga barangay workers ng Davao Region, ng Davao del Norte sa kanilang mainit na pagtanggap sa opisina ng BHW Partylist. Asahan n’yo po ang aming suporta sa ating mga barangay health workers at sa ating mga kabarangayan,” pagpadayag sa representante.

Writer: Lorna P. Tripoli