Gipangunahan ni Governor Edwin “Kuya Gov” Jubahib ug Congressman Pantaleon Diaz Alvarez ang ground breaking ug unveiling ceremony alang sa pagatukurong three – storey Hall of Justice nga nahimutang sa Capitol Compound, Mankilam, Tagum City, niadtong Septyembre 19, 2022.

Gitambongan kini sa mga labaw sa departamento sa kapitolyo, kuyog sab ang mga kadagkoan gikan sa hudikatura.

Ang maong gambalay, gigahina’g pondo ni Congressman Alvarez sa kantidad nga P50 milyon.

Sa mensahe ni Cong. Alvarez, iyang gihangyo ang mga huwes nga paspasan sa pagsulbad ang mga kasong gipasaka sa ilahang hawanan. Saysay ni Alvarez nga dekada 90 pa ang iyang kaso hangtud karon wala pa nahuman. Gibati siya’g kabalaka nga basin dili na makatambong sa hearing ang iyang abogado gumikan sa katigulang niini.

“Pasalamat ko kang Governor kay after visiting sa mga sala nila Judge, Executive Judge Sharon, problema pa adto walay yuta. Ingon ko, ako nay bahala mopatukod sa building but we have to request, kining lote para butangan sa building. So, ingon siya wala pa daw nisugot si Governor. Ingon ko, akong hangyoon si Governor nga tagaan ta’g lote dinhi sa sulod sa Capitol Compound. It was a good thing nga si Governor paspas kaayo modesisyon og nihatag dayon siya ani nga yuta,” pagsaysay ni Alvarez.

Sumala ni Gobernador Jubahib nga siya kanunay andam sa paghata’g suporta sa hudikatura, pinaagi sa pagpanindut sa ilang pasilidad nga sarang magamit sa daling pagproseso sa mga nanginahanglan og tamang hustisya. Gipaabot sab sa gobernador nga kaayohan lamang sa mga Dabaonon ang iyang atimanon.

“Niadto sa akoa ang atong ever dynamic First District Congressman. Ni-approach siya sa akoa. Ingon siya, Gov kabalo kong naproblema ka’g pondo aning Hall of Justice. Unya, ako pwede ko mobutang og budget. Ang problema nako yuta. Ingon ko, ah atomatik, naa dayon ta’y yuta. Naay 1,000 sqm. Himoan nato og deed of usufruct para nga mao na gyud ni siya ang gamiton lifetime sa atong Hall of Justice para sa mga judges. Ug mao na ni karon. Ug nakalami ani kay ang atong Congressman nagbutang dayon og initial budget nga P6 milyon. Pwede na nga i-initial diretso para sa foundation ang P6 million,” sulti ni Jubahib.

Nagpaabot sa iyang pasalamat si Deputy Court Administrator for Mindanao Judge Leo Madraso kang Kuya Gov ug kang Congressman Alvarez sa ilang suporta, nga mahatagan og bag-ong gambalay ang Hall of Justice sa probinsya. Nanghinaut siya nga mobisita ang chief justice panahon nga mahuman na ang maong konstruksyon.

“We in the judiciary are very much happy that the efforts of the governor and the congressman has started to bear fruit. I see the design and I was signaling to my two engineers who are with me, na murag masunod ang gusto ni chief justice na, there will be four pillars in front of the Hall of Justice which will indicate the four values of the Judiciary which is competent, integrity, probity and independence,” matud sa huwes.

Dako ang kalipay nga gibati sa mga personahe sa hudikatura sanglit duna na silay halapad nga espasyo nga magamit aron pagtubag sa ilang mandato. 

Writer/Photo: Nestor Mata, Jr.

 

 

DavNor News