Nakig-alayon ang mga Provincial Disaster Risk Reduction & Management Offices sa Davao del Sur, Davao Occidental ug Dinagat Islands sa probinsyal nga panggamhanan sa Davao del Norte aron pagtuon sa mga pamaagi sa disaster management and prevention sa probinsya. Pipila lamang kini sa mga LGU nga nidayo sanglit ginabisita na pirme ang PDRRMC DavNor alang sa benchmarking.

Gibisita sa mga benchmarking team ang Monitoring and Warning Center ug gitun-an nila ang Early Warning System sa Davao del Norte nga gatabang sa pag-monitor sa lakat sa panahon ug pagtan-aw sa lebel sa tubig sa mga dagkong kasapaan sa probinsya.

Sumala ni Eric Rocillo, Provincial DRRMC – Early Warning Section Head, bililhon ang mga state-of-the-art preventive systems sa PDRRMC sa probinsya tungod sa grabeng tabang nga mahatag sa early warning system sa katawhan kung aduna’y kalamidad.

Dugang pa niini, talgsaon ang maong buhatan sanglit mayhap lamang ang dunay susamang kapasidad sa tibuok nasud.

Gipahingusgan sa mga DRRM officers sa Davao del Norte ngadto sa ilang mga bisita ang importansya sa edukasyon sa kabarangayan kalabot sa teknikal nga aspeto nga gina-implementa karon sa DavNor. Kini aron makabalo ang katawhan sa kung unsa ang dapat buhaton kung aduna’y warning signals gikan sa mga kagamitan sa PDRRMC sama sa alarm systems kung panahon sa kalamidad.

Dugang pa sa gitun-an sa mga benchmarking team ang kabililhon sa localized weather forecasting aron sa mas komprehensibo ug mas detalyadong pag-monitor sa lakat sa panahon sa mga munisipyo ug siyudad.

Gitambagan sab sa PDRRMC ang mga bisita nga kaya kining buhaton sa ilang mga probinsyal nga panggamhanan basta hinay-hinayon lang og implementa ang mga kabag-ohan nga ilang gusto mahitabo.

Kahinumdomang awardee na usab ang PDRRMC – DavNor sa Gawad Kalasag ug gi-ila kini sa mga evaluators atol sa national evaluation sa Seal of Good Local Governance sa DILG tungod sa talgsaong state-of-the-art nga pasilidad sa probinsya.

Usa sa mga tumong sa KUYA GOB NG MASA 13-POINT AGENDA ni Gobernador Edwin I. Jubahib ang pagtukod sa mga imprastruktura ug pasilidad nga makatabang sa mga katawhan nga mamahinong disaster-ready.

 

 

 

DavNor News