Personal nga mitunol og mga tsokolate, mugs, ug usa ka stem na rose si Gobernador Edwin “Kuya Gob” Jubahib ngadto sa mga magtutudlo gikan sa mga eskuwelahan sa lungsod sa Tagum isip pasidungog sa ilang pagpaningkamot sa paghulma ug pag giya sa mga estudyante ilabina karong panahon sa pandemya.

Gibisita sa gobernador ang Tagum City National High School (TCNHS) nga nagpakita sa ilahang mainiton na pagdawat pinaagi sa pagpahigayon og mubo na programa aron pasalamatan sab si Kuya Gob.

Gisaysay ni Kuya Gob nga sugod sa iyang paglingkod, gisaulog niya ang Valentine’s Day pinaagi sa paghatod og mga bulak ug tsokolate sa mga magtutudlo ingon pagsaludo sa ilahang serbisyo na maghatag dugang kaalam sa mga kabatan-onan.

“Kini nga programa nato sa province since ni paglingkod nako na nagahatag g’yud ko’g flowers ug chocolates sa tanang teachers every year isip pasalamat sa inyong pagserbisyo ug paghatag kaalaman sa atong mga estudyante…sa inyong pagmahal sa mga kabataan ug agi usab na sign sa akong paghigugma sa matag-usa kaninyo,” pag explikar ni Kuya Gob.

Gihatagan sab sa gobernador ang mga PG Department Heads sa Kapitolyo sa maong “pahalipay” ingon ekspresyon sa iyang dakong gugma sa ilahang kakugi ug pagpakita og dakong importansya sa ilahang walay puas na serbisyo sa mga katawhan sa Davao del Norte.

“Ang atong program karon ay isang pagbibigay halaga na in one year sa dami ng problema, trabaho, sa magandang serbisyo na binigay niyo sa constituents sa Davao del Norte…ito ay isang handog pasasalamat para sa inyo na ang serbisyo nato sa Davao del Norte is with love. I love you all. Daghan kaayong salamat sa inyohang suporta,” sulti sa gobernador.