SIPAG, TIYAGA uban sa tabang sa KAwsa sa AGrikulturA ug PAnginabuhian sa barangaY kun KAAGAPAY, ang puhunan sa pamilya ni Danilo Delfin aron makapahimo og presentable nga balay didto sa Sto. Niño, San Isidro (Sawata), Davao del Norte.
Ang pagpananom og gulay mao na gyod ang panginabuhian sa pamilyang Delfin apan gumikan sa COVID-19 lockdown niadtong 2020 nagpatabang siya sa KAAGAPAY kay gidili ang paggawas sa ilang lugar bisan ang pagbaligya sa ilang produkto didto sa Tagum City ug pagpalit semilya.
“Nag-gulayan na ko sa una pero sukad sa pagka-membro nako sa KAAGAPAY gikaluy-an pod ko sa Ginoo kay naay tabang sa gobyerno nga mga seedlings kay nag-lockdown baya to, pait kaayo tong panahona. Sa nasagop ko sa KAAGAPAY gitagaan ko nila’g mga seedlings, akong gipananom, mora’g nadasig ko. Sari-sari; talong, kalbasa, daghan to, mga atsal, batong,” pagsaysay ni Danilo nga bisan pag-adto sa iyang uma harangon una siya sa checkpoint ug sukit-sukiton.
Ang nadawat nga KAAGAPAY liso sa kalabasa gitanom ni Danilo sa halos duha ka ektaryang luna didto silingang barangay sa Sabangan apan wala hinuon magtug-an sa nahimong halin.
“Kaluy-an pod kay tong didto sa Sabangan naka-iskor jud ko atong panahona. Mao gani hinungdan pod nga naka-relocate pod ko sa akong payag diha karon. Mao na’y hinungdan adtong harbesa kay volume man to. . Mao gyod to’y dakong nakatabang nako nga naka-repair jud ko sa akong balay. . kutob sa income nako hapak dayon nako’g materyales. Halinan ko’g diyes mil, kinse mil, deretso dayon nako kay kining mananom ta usahay ma-failure pod ta,“ padayong asoy ni Danilo nga wala magtug-an sa tanang halin sa produkto sa halos dos ektaryang kalabasaan nga nakatayming tag P20 ang kilo.
Mapasamalaton kaayo ang pamilyang Delfin sa programang KAAGAPAY ni Kuya Gob nga ang halin sa gulay ilang gigasto sa maalamong paagi lakip na ang pagpalit og “rights” aron dunay pwesto sa Sawata Public Market nga diha ma-display ang ilang produkto.
Sa iyang bahin si Ms. Delia Bermoy nga na-asayn sa barangays Sto. Niño ug Sabangan sa Sawata aron ihatod sa mga mag-uuma ang programa sa KAAGAPAY sa daghang paagi nalipay nga wala batiang kalisod ang pagkahimong KS staff gikan sa naandang trabaho nga Instructional Manager sa ALS. May nakat-onan pa gani siya nga mga bag-o gikan sa KAAGAPAY ug desidido nga ihatod ang serbisyong gikinahanglan sa mga marginal mag-uuma hangtod naa pa ang programa.
Gawas sa pamilya ni Danilo Delfin nga nakapahimo og balay gikan sa KAAGAPAY gulay, didto sab sa barangay Magwawa, Sto. Tomas, ang pamilyang Fernandito Polloso nakapalit og second hand motorsiklo ug chainsaw samtang si Joseph Rizon nakapalit sab og carabao gikan sa halin sa mga gulay pinaagi sa tabang sa KAAGAPAY.
*****************///
