MIABOT og 37,610 ang nakadawat first dose bakuna unang adlaw sa tibuok probinsya nga pagpahigayon sa DavNor Bayanihan Bakunahan Nobyembre 29-Disyembre 1, 2021.
Didto sa lungsod sa Talaingod gipahigayon ang “kick-off” nga gitambongan pa sa mga personahe gikan sa DOH Region XI, DILG, Bureau of Fire Protection (BFP), kapolisan ug DavNor Provincial Vaccination Team nga gipangunahan ni Dr. Alfredo Lacerona.
Ang kanhi nagduhaduha Mayor Jonie Libayao desididong magpabakuna apan ang pagtaas sa pressure sa dugo nag-postpone sa iyahang first dose. Ang iyang asawa, mga anak, Vice Mayor Dondon Gipulla ug Sto. Niño Barangay Captain Romy Bucaron ang nahimong “sample” alang sa ceremonial jabs.
“Magpa-vaccine ko unya taud-taod kay morag init pa kaayo akong lawas. Nauna na si misis, akong mga anak naa diha. Unya pa ko kay mora’g naa pa ko’y gibati gamay,” pahayag ni Mayor Jonie Libayao.
“Gusto nato nga mabalik ta og normal, kining atong operation sa munisipyo ug labina sa katawhan dinhi sa sentro nga kinahanglan mabakunahan aron madepensahan ang ilang sarili kay di man nato malikayan magtapok-tapok. . Dako kaayo ni nga kaayohan ang gihimo sa atong national government labina sa atong probinsya nga gipangulohan sa atong buotan nga Kuya Gob. Gani halos full-force karon ang probinsya dire aron lang gyod mahatag ni Kuya Gob,” dugang pahayag sa Mayor nga misaksi sa pinaka-unang midawat sa bakuna nianang adlawa.
Bisan kung ang tribo layo sa sentro, giawhag gihapon sa Mayor nga magbakuna sanglit dili kalikayan nga daghan ang mosaka kay mitunhay na ang peace and order sa Talaingod bisan sa kabukiran.
“Akong gina-awhag ang katawhan labina sa kabukiran nga kinahanglan pa-vaccine kay dili ta mosalig nga way COVID nga makaabot didto. Bisag bukid tuod na pero wala ta kabalo nga kanang mga dayuhan manaka didto sa taas basig mao na’y modala sa ingon ana nga sakit. At least madepensahan nato ang atong sarili, kinahanglan mobaba na dire aron magpa-vaccine kay tulo ka adlaw pa ni,” panawagan sa Mayor.
Ang batan-ong sakop sa tribong Ata-Manobo wa na mahadlok nga nagpa-vaccine aron makalikay sa sakit uban sa panawagan sa ka-tribo nga mga batan-on.
“Iwas COVID. . Magpabakuna na pod mo kay dili na tinuod ang gipang-ingon sa mga tao, fake news lang na,” matod sa 16-anyos nga Janine Maila Sumatra Jayme nga nanghimakak sa nadungog nga “ma-zombie” kadtong magpa-vaccine.
Dunay 462 nga nakadawat first dose sa Talaingod samtang ang capital sa Davao del Norte nga Tagum City mitala og 11,901. Bisan kung wala makab-ot ang tibuok “daily target” bakunahan nga 56,235 apan ang gidaghanon dako na nga epekto sa gitumong “herd immunity” hangtod mahuman ang 2021.
Ang Bayanihan Bakunahan maoy tibuok nasod 3-ka adlaw nga kampanya sa Department of Health (DOH), paningkamot aron gyod maabot ang herd immunity sa dili pa matapos ang tuig 2021. Hinuon laing Bayanihan Bakunahan ang himoon karong Disyembre 15-17 nga ang tibuok DavNor andam mosuporta aron masiguro maabot ang tumong. [pix--Allen J]
*************///
