GAWAS sa regular duha ka adlaw matag semana nga pangbakuna, mihimo’g paningkamot ang probinsyal nga panggamhanan ni Gobernador Edwin “Kuya Gob” Jubahib nga mapadali ang “herd immunity” pinaagi sa Davao del Norte Provincial Health Office mobile vaccination team.
Ang herd immunity nagpasabot nga 70% sa populasyon makadawat na sa kumpletong bakuna.
Gisugdan niadtong Oktubre 26, mihimo ang PHO og mobile vaccination sa mga barangays Cabay-angan ug Tanglaw sa Braulio E. Dujali ug sa Mesaoy, New Corella diin 1,403 ka tawo ang nabakunahan og 216 niini nakadawat na’g duha ka doses.
Ang Braulio Dujali ug New Corella maoy apil sa LGUs nga ubos ang vaccination rate.
“Ang akong sakit nga gikan pa gyod sa pagkabata kanang hubak,” matod ni Dioscoro Pamunag, 65 anyos nga taga Purok 7 Cabay-angan apan wala magduha-duha nga magpabakuna niadtong Nobyembre 16 didto sa Barangay Gym aron “makasuroy-suroy ug dili lang stay-at-home.”
Nanawagan pa si Dioscoro sa ubang residente sa iyang barangay nga magpabakuna na sanglit gidala na gyod sa ilang barangay ang serbisyo.
“Kadtong wala magpabakuna, pabakuna na mo ron kay sa pagka Enero mora’g masuko na ning atong Presidente,” matod sa 65 anyos nga taga Cabay-angan.
Ang panimalay ni Lolita Segumban sa Purok Sampaguita “nabahin” apan desidido siya nga magpabakuna kay ang “serbisyo gipaduol” na gyod sa ilaha.
“Para proteksyon sa atong katigulangon. Akong bana, naa ko’y anak isa nga wala pa. Ambot nila di man nato makuan. Di gani unta sila mosugot nga mopabakuna ko, pero ako, gusto gyod nako. Di sila mosugot pero ako mipugos gyod ko, adto ra ko og akoa dire,” matod ni Lolita.
Gidugang ni Lolita nga kinahanglan gyod niya ang proteksyon sanglit kanunay siya nga ikuyog sa biyahe.
“Kay kana usahay magsuroy-suroy ta; gidaladala baya ko bisan asa lang asa akong amo. Nakaabot mi’g Surigao, bisan asa. Di ko nila dad-on kung di ko pabakuna. So alkansi ko,” pasabot sa 64 anyos nga misis.
Mobalik ang Mobile RESBAKUNA ni Kuya Gob karong Nobyembre 23 sa Barangay Tanglaw, BE Dujali ug pagka Disyembre 15 sa Mesaoy, New Corella.
Gawas sa Huwebes-Byernes regular eskedyul nga pangbakuna nga gihimo diha sa Clubhouse, DavNor Sports Complex, apil ang PHO sa nationwide “Bayanihan Bakunahan” nga himoon karong Nobyembre 29 hangtod Disyembre 1, 2021.
