Human ang 17 ka tuig gikan sa iyang pagkahimugso, nakabaton na jud og bag-o ug moderno nga Municipal Police Station ang lungsod sa San Isidro, Davao del Norte.

Sulti ni Police Regional Office (PRO)-XI Chief Brigadier General Filmore Escobal nga ang P8.6 million nga bag-ong estasyon sa pulisya usa ka monumento sa lig-on nga pagtinabangay sa local government units ug sa pulisya sa pagpatunhay sa kahapsay ug kalinaw sa komunidad.

Gipaabot sab sa heneral ang iyang pasalamat kang Governor Edwin "Kuya Gob" Jubahib sa iyang pagdonar sa lote, aron maoy tindogan sa maong police station.

"This will serve as a symbol of the very strong partnership and collaboration of the local government and the Philippine National Police... in securing the people," ingon ni Escobal.

Gidasig niya ang kapulisan sa lungsod aron himuong inspirasyon ang ilang 'standard' ug modernong opisina sa paghatud sa pinakamaayong serbisyo sa katawhan.

"Look at this building as your source of inspiration. It gives you comfort. Therefore, as you are now comfortable in your new office, you should deliver the best police service that you can deliver," sulti niya, samtang iyang gihataga'g hibug-aton ang disiplina ug maayong pamatasan sa kapulisan sa ilang pagpanarbaho.

Gidayeg sab ni Governor Edwin "Kuya Gob" Jubahib ang kapulisan sa ilang madasigong pagmintinar sa kahapsay ug kalinaw sa tibuok lalawigan, nga usa sa nag-unang prioridad sa iyang administrasyon.

"Dako ang akong pagtahud sa atong kapulisan tungod sa ilang pakighiusa sa atong panggamhanan sa probinsiya aron mapadayon ang kahapsay ug seguridad sa Davao del Norte," sulti niya, sa iyang mensahe nga gibasa ni Provincial Administrator Engr. Josie Jean Rabanos.

Balik nga gidayeg sa gobernador ang Revitalized Police sa Barangay (RPSB) nga dakong tabang aron mapatuman sa probinsya ang pasalig niini sa programa sa gobyerno nga ending local communist armed conflict (ELCAC).

Butyag ni Mayor Arnel Sitoy nga nahimong posible ang maong proyekto sa pundo nga gikan sa kaulohan ug sa yuta nga gi-donar ni Kuya Gob, aron tukuran sa police station, apil ang tapad nga Municipal Gym sa San Isidro.

"Mapasalamaton kita'g dako sa yuta nga gi-donate ni Kuya Gob aron mahimong posible ang pagtukod nato niining importante kaayo nga mga imprastraktura sa lungsod," sulti sa mayor.

Mibutyag si Sitoy nga tubagon sa munisipyo ang mga panginahanglanon sa opisina sa pulisya, sama sa mga computer, muwebles, 'fixtures', ug uban pa.

 

 

 

 

 

DavNor News