Gi-abi-abi ni Department of Education (DepEd)-XI Regional Director Dr. Allan Farnazo ang 1.271 million ka mga estudyante sa Davao Region, sa opisyal nga pag-abli sa klase karong adlawa sa pampublikong elementary ug sekondarya taliwala sa pandemya.

“We welcome you to a vibrant, vigorous, victorious (Gi-abi-abi kamo nako sa maabikon, baskog, ug madaugon nga) School Year 2021-2022,” sulti sa director, atul sa Regional Kick-Off of Opening of Classes sa Sto. Tomas Central Elementary School SPED Center.

Gikalipay sa director nga ila nang naabot ang 91.7 percent sa ilang target nga enrollment sa maong school year, nga karon pa nahitabo sa Rehiyon 11.

“Sa gitna ng Covid... mas lalong tumatatag, tumatapang at lumalaban ang Davao Region,” ingon siya.

Padayon gihapon ang pamaagi sa Self-Learning Modules (SLMs) sa mga eskwelahan, sanglit wala pa gitugot ni President Rodrogo Duterte ang face-to-face classes kon atubangay nga pagtuon.

Kini aron protektahan ang mga kabataan sa nagpabilin pa nga dakong hulga sa COVID-19, labaw na karon nga mibalik paspas pagdaghaan sa mga bag-ong kaso gumikan sa mas isog nga mga variants niini, sama sa delta variant.

Pero, bisan pa sa daghan hagit nga giatubang sa mga magtutudlo, gidasig sila ni Farnazo nga magpasalamat sa daghang benepisyo nga ilang nadawat, labi na sa dakong panalangin sa padayon nilang trabaho, sanglit milyon-milyon ang nawad-a’g trabaho tungod sa krisis.

“Ilagay natin ang ating isip at inspirasyon sa saktong pagbubukas ng klase... na ang department of Education ay isang department that takes care of its workers and fights for the interest of each teacher,” maoy gihataga’g hibug-aton sa director.

Gipasalamatan sab ni Farnazo ang mga stakeholders sa padayong suporta nga ilang ginahatag sa sektor sa edukasyon.

Bisan og wala nakatambong si Kuya Gob Edwin Jubahib sa maong okasyon tungud sa kakulian, gisiguro niya ang gipakusgan nga tabang sa Probinsya nga Panggamhanan sa Davao del Norte sa mga eskelahan.

Gani, gawas sa suporta sa probinsya sa Brigada Eskwela, mikuot mismo si Kuya Gob sa iyang sariling bulsa aron personal nga midonar sa P1 milyon alang sa Shared Service Facility sa Tagum National Trade School, ingon nga suporta sab sa Bamboo Industry Development.

Kahinumduman nga sa milabay nga tuig, gihataga’g pondo sa probinsiya nga P38.85 milyones ang programa sa edukasyon. Apil niini ang kapin 20 ka mga lagyong eskwelahan alang sa mga magtutunghang IPs sa mga bukid-bukid nga dapit sa probinsya.