Usa sa ginatan-aw karon nga epektibong pangontra batok covid-19 bayrus mao ang virgin coconut oil sumala sa pagtuon nga gihimo sa Department of Science and Technology pipila ka bulan na ang milabay.
Napamatud-an sa ilang clinical tests nga nikunhod 60% hantud 90% ang viral load o gidaghanon sa bayrus sa likidong bahin sa lawas nga nakaplagan sa dugo sa mga nataptan sa covid. Tungod kini sa taas nga anti-microbial ug anti-viral properties sa monolaurin ug lauric acid nga naa sa VCO. Paspas ang pag-alibyo sa mga sintomas hinungdan sa dali nga pag-ayo sa mga pasyente nga nahatagan niini.
Gisaysay ni Philippine Coconut Authority XI Regional Director Juvy Alayon nga subay sa RA 11494 o Bayanihan to Recover as One Act ni Presidente Rodrigo Duterte ug isip suporta sa positibong resulta sa clinical research sa DOST, ang PCA magtukod og 18 ka mga VCO processing sites sa tibuok Pilipinas.
“Sa tibuok Pilipinas 18 ka buok ang na-approve ug usa ang Davao del Norte sa Region XI nga nakadawat niini. Dili tanan nahatagan kay gipaigoan lang pud ang pondo. Nakita nga diri sa DavNor ang strategic location sa proyekto tungod kay naa siya sa sentro,” pagsubay ni Alayon.
Ang pondo nga P17,700,000 maoy igahin alang sa ipatukod nga pasilidad lakip na ang mga ekipo. Apan ang kapital aron makasugod padagan ang maong planta, magikan sa Local Government Unit o Farmers’ Association nga magdumala niini.
Sumala ni Davao del Norte Gobernador Edwin “Kuya Gob” Jubahib nga mao na ni ang solusyon sa gobyerno sa dugay nang problema sa pagkalugi sa mga coconut farmers. Imbis nga dal-on pa sa Toril, Davao City aron himoong lana o mantika ang mga abot nga lubi, diri na sa probinsiya iproseso.
“Magkaroon tayo ng magandang presyo kasi ibawas natin ang transport cost, idagdag sa presyo. Kikita na ang ating coconut farmers. Ito ay isa ring solusyon ng ating pamahalaang Duterte na iyong ating farmer ay matulungan,” pagpasabot ni Kuya Gob.
Gihan-ay na ang petsa kung kanus-a ang groundbreaking lakip na ang lugar nga tukoran sa nahisgutang planta nga mahimutang sa New Balamban, Tagum City.
Apil sa mga nanambong sa Memorandum of Agreement Signing mao sila PCA XI-Acting PDO William Mortalla, PCA XI-Admin Assitant Nicole Kevin Tagudin, PCA Tagum-OIC Provincial Manager Benigno Manatad, PCA Tagum-Agriculturist II Jacinto Amora, PCA Tagum-Coconut Development Officer Leine Marie Sioco, DavNor Provincial Agriculturist Jose Andamon ug DavNor OIC-Assistant Provincial Agriculturist Engr. Leonilo Patayon.
