GIBANDILYO sa Davao Regional Medical Center ang kadaot nga dala sa pag-abuso ug droga pinaagi sa usa ka live press conference atol sa Kapihan sa DRMC kagahapon, Agosto 10, 2016.
Ang aktibidad maoy kabahin sa pagsaulog sa Hospital Week nga adunay tema: “Hospital Kaagapay Para sa Malusog na Isip at katawan tungo sa Pagbabago.”
Atol sa live press conference, gipasabot ni RXI Department of Health psychologist Zander Von Baylon ang grabeng kadaot hatod sa pag-abuso ug droga na usa ka tibuok kalibotan nga problema.
“Drug addiction is a global problem. A form of mental illness, a disease that causes a person to lose control over use of alcohol and other drugs (AOD). The loss of control causes physical, psychological, social and spiritual problem. It is a kind of brain disease, changing the structure of the brain. If brain is damaged, it is permanent,” matod sa RXI Department of Health psychologist Zander Von Baylon.
Dugang gihisgotan sa psychologist nga tungod sa kadaot sa utok, kini maghatod ug personal, emosyonal, “spiritual bankcruptcy” ug pamilyahanong suliran gawas pa sa pisikal nga sakit.
Ang mga ang-ang sa pag-abuso ug droga magsugod gikan sa pag-eksperimento (experimental) ngadto na sa lingaw-lingaw (recreational) nga katuyoan nga magtukmod sa usa ngadto sa pagkahimong regular nga tiggamit (regular user) hangtod na gyod sa iyang pagkagumon (addiction) nga nagdaot na sa iyang utok. Lisod na unya ang pagbangon sa usa nga naggumon na sa pag-abuso sa droga.
Gihisgotan usab ni Baylon nga ang sobra 8,000 ka mga drug surrenderees gikan sa probinsya nagkinahanglan ug “profiling” aron matino kun pila ang tinuod nagkinahanglan ug rehabilitasyon.
Gawas sa pagbandilyo sa dakong kadaot nga dala sa pag-abuso sa droga, gihatagan usab ug pagklaro ni Medical Center Chief II Dr. Bryan Dalid ang pipila ka “mulo” nga ilang nadawat sama sa “shortage sa doctor ug mga tambal” nga ang tanan ilang giisip nga “positibong pagsaway” aron ilang mapauswag pa ang serbisyo ngadto sa publiko.
Matod sa hepe sa DRMC nga bisan hangtod sa pagpahinabo sa press con, nanginahanglan sila ug dugang daghang doktor tungod sa pagka-kombertir gikan sa 200 ngadto sa 600-kapasidad nga katre nga hospital. Apan ikasubo nga kadaghanan sa mga doktor dili interesado nga mosulod sa gobyerno sanglit ubos ang makuhang bayad kung ikumpara sa pribado.
Kahinumduman nga nahimong balaodnon ang pagkakombertir sa 200-katre nga Davao Regional Hospital ngadto sa pagka 600-katre Davao Regional Medical Center (HB 00067-RA 10678 Agosto 26, 2015) panahon nga congressman pa si Gobernador Anthony del Rosario.
Labot usab sa “shortage sa tambal” giklaro ni Dr. Dalid nga daghang butang ang angay’ng konsiderahon ilabina ang pamaagi sa gobyerno sa pagpalit ug mga tambal ubos sa RA 9184 kun Government Procurement Reform Act. (pioDavNor)
