News

Dagkong papremyo gidalit sa pagsaulog sa 2023 Children’s Month

Details

Published: Friday, 15 December 2023 18:18

Written by DavNor PICKMO (Lorna P. Tripoli)

Views: 337

Nagkapuliki ang mga kabataan og bitbit sa mga regalo, ug hilabihan ang ilang kalipay sa mga surpresang nagpalingaw kanila gikan sa mga mascot. Usa ka pinasahing kahigayonan nga sila gitapok alang sa pagsaulog sa 2023 Children’s Month ubos sa temang “Healthy, Nourished, Sheltered: Ensuring the Right to Life for All”.

Ang maong okasyon gipangunahan sa Department of Labor and Employment (DOLE) Field Office XI ubos sa pagdumala ni DOLE XI Provincial Head Angelina A. Talingting, katambayayong ang Probinsyal nga Panggamhanan sa Davao del Norte pinaagi sa Provincial Social Welfare and Development Office (PSWDO), Provincial Information, Communication and Knowledge Management Office (PICKMO), ang ChildFund Philippines, Kaanib Foundation Inc., Philippine National Police ug uban pang ahensiya.

Dili lamang mga kabataan ang adunay mga pahalipay, lakip ang mga ginikanan nga mga benepisyaryo sa panginabuhiang gipondohan og gatosan ka libo ka pesos gikan sa nasangpit nga ahensiya.

Upat ka mga barangay ang gitunolan og ceremonial cheque balor P500,000 matag usa, sama sa Brgy. San Miguel Bigasan Station, ug Brgy. Salvacion, lungsod sa Sto. Tomas, Brgy. Alejal, ug Brgy. Magsaysay, lungsod sa Carmen. Alang kini sa 60 ka benepisyaryong ginikanan sa kabataang gitawag og “Child Labor”. Samtang, nidawat usab ang probinsya sa higanteng cheque nga nagkantidad og P600,000. Hinabang kini sa DOLE alang sa proyektong panginabuhian sa 30 ka mga benepisyaryo alang sa produkto sa DavNor MSMEs.

Nibuhagay usab ang mga pahalipay’ng salapi alang sa napiling Most Functioning Local Council for the Protection of Children, LCAT-VAWC, ug DASACASM Social Media Contest nga gidaogan sa mga kapulisan. Nidawat og premyong salapi ang ubang mga police station sa nagkadaiyang lungsod nga nagpatuman og mga programa alang sa proteksyon sa mga kabataan.

Nanguna sa pagpakita’g suporta sila Governor Edwin "Kuya Gov" Jubahib, Senator Christopher Lawrence "Bong" Go, mga private stakeholders sama sa Davao Light and Power Company, ug Tagum Cooperative, sa mga "Child Labor” pinaagi sa mga gipangtunol nga mga pagkaon, school supplies, ug uban pang mga kagamitan.

"Pasalamat ta sa atong panggamhanan nga adunay nagatutok niining mga kabataan nato para gyud mahatag kung unsay angay diha kanila," sulti ni Gov Edwin Jubahib sa sulat nga gibasa ni Renante Monares, representante sa gobernador.

Gitapos ang usa ka bulan nga kasaulogan sa mga Kabataan niadtong Nobyembre 29, 2023 sa Robinsons Place Tagum nga gitambongan sa mga representante sa mga Non-Government Organizations, Department of Justice, Provincial Council for Protection of Children, MSWDs, CSWDs, mga magpapatigayon, ug uban pang indibidwal.