Acting Governor Oyo Uy nitunol og financial assistance sa mga biktima sa sunog ug uban pa
- Details
- Published: Thursday, 25 April 2024 10:30
- Written by DavNor PICKMO (Nestor H. Mata, Jr.)
- Views: 18
Gipangunahan ni Davao del Norte Acting Governor Decarlo “Oyo” Uy ang pagtunol sa financial assistance sa 38 ka mga benepisyaryo nga nakasinati og nagkadaiyang trahedya ug problema sa kinabuhi, sa SP Building, Government Center, Mankilam, Tagum City.
Sa mensahe ni Acting Governor Uy, siya nanaad nga magpadayon ang mga programa ug serbisyo sa probinsya bisan pa man sa nasinatiang kasikas sa kapitolyo gumikan sa pagkasuspenso ni Governor Edwin “Kuya Gov” Jubahib.
“Naa ta dinhi karon nagtapok ta kay atoa gihapong gusto ug tumong nga despite sa mga panghitabo ug challenges sa atoang panggobyerno karon, dapat ang pinakaimportante nga luyo sa politika padayon gyud gihapon ang serbisyo para sa katawhan. Ang akoa gyud dayong gusto nga mahitabo nga dili gyud maha-hamper, dili gyud madugay ang serbisyo sa gobyerno,” sulti ni Oyo.
Nihangyo si Acting Governor Uy sa mga department heads ug sa mga empleyado sa kapitolyo nga ipadaplin una ang politika ug ipatigbabaw ang paghatud serbisyo sa katawhan. Nanghinaut sab siya nga magkahiusa ang tanan alang sa pagkab-ot sa dugang kalamboan sa probinsya. Dugang niya nga walay mga empleyadong matanggal sa ilang trabaho.
“Kabalo ko medyo naging divisive but akoa lang hangyo sa tanan nga i-set aside nato ang politika, magtrabaho lang sa ta. So, mao to giingnan pud nako nga walay major movement nga mahitabo, walay matanggal nga mga tao. Ang pinakaimportante ug gusto gyud nako nga magpadayon ang serbisyo sa gobyerno. Kung naa may away politika, dapat dili madamay ang katawhan,” matud ni acting governor.
Gibatbat ni Board Member Orly Amit ang kamahinungdanon kung adunay maduolan sa nasudnong panggobyerno, mas daghang pondo ang masungkit nga mahatag sa katawhan ilabi na panahon sa kalamidad.
“Kung kinsa to’y kalinya sa presidente paghuman sa eleksyon, magpadayon ang tabang sa iyaha kay kalinya man sila. So, mao nay akong hangyo sa mga katawhan sa probinsya kinahanglan atoa pong hunahunaon ang kaayohan sa atong lungsod ug sa atong probinsya. Kinsa man sa mga tao nga adunay kapasidad nga maka-access og kwarta didto sa nasyonal? Kinahanglan ta’g mga leader nga adunay koneksyon sa taas,” ingon ni BM Amit.
Malipayong gidawat sa mga benepisyaryo ang kantidad P10,000 alang sa nasunogan nga naugdaw ang panimalay, P5,000 ang partially damage ug P3,000 sa nangarkila. Kalakip sa midawat ang pipila ka namatyan, biktima sa landslide, biktima sa linog, ug distressed OFW.
Writer/Photos: Nestor Mata, Jr.
