Aron mas palig-onon pa ang ilang kahanas sa pagsibya ug pagmantala, nagtigum ang mga media practitioners gikan sa nagkadaiyang local radio stations, newspapers, ug social media news outlets sa Davao del Norte atol sa Conference on Development Communication and Community Journalism, Oktubre 18, 2022, sa Bulwagan ng Karunungan, Capitol Compound.

Nakita ni Provincial Information, Communication and Knowledge Management Office (PICKMO) Head Dr. Mervin Jay Z. Suaybaguio nga ang maong journalism seminar-conference usa ka paagi aron ma-professionalize ang mga media practitioners sa Probinsya.

Giimbitahan ang lain-laing de-kalibre nga mga speakers aron mohatag og mahinungdanong pagtulon-an kalabot sa journalism.

Mipaambit si Dr. Maria Gemima Valderama mahitungod sa Basic News Writing and Radio Broadcasting, si Davao City Assistant Prosecutor Atty. Peter Paul Tombo kalabot sa Fundamentals of Media-Related Laws ug si MTRCB Board Member Rico Pablo, Jr. alang sa MTRCB Guidelines.

Atol sa conference, gihatagan og gibug-aton ni Provincial Information Officer Suaybaguio ang kamahinungdanon sa pagpalig-on sa media, sanglit dako kining kabahin sa ekonomikanhong kalihokan sa Probinsya ug alang sab sa kalamboan sa matag katawhang Dabaonon.

Gibutyag sab ni Suaybaguio atol sa conference ang plano sa pagmugna og Provincial Media Board aron mapalambo ang kaayohan ug propesyonalismo sa mga lokal nga mamahayag sa Davao del Norte.

Gipasalig sa Provincial Information Officer nga sa maong Media Board, sigurohong dunay representante ang matag media categories lakip ang print media, broadcast and content creators, media organizations, city and municipal information officers, ug student journalists.

Ang nahisgotang Conference on Development Communication and Community Journalism, usa sa mga highlight nga aktibidad subay sa pagsaulog sa Provincial Press Freedom Month karong bulana.