“In fact one of the very reasons kung bakit po nandito ang mga bata dahil to divert their attention. As kids we must develop our physical condition. We must improve that kay duna tay Summer Sports Camp,” matod ni Provincial Sports Coordinator Giovanni Gulanes atubangan sa sobra isa ka libo nga mga partisipante ug mga ginikanan nga nagkuyog kanila.

Gidugang sa Sports Coordinator nga ang administrasyon ni Gobernador Rodolfo del Rosario adunay dakong programa alang sa paugnat sa kusog uban sa katuyoan nga madiskobrehan ang mga hawod nga atleta sa nagkalain-laing dula ug mamahimong sports scholars sa Davao Sports Academy, ang pinakaunang eskuylahan sa paugnat sa kusog sa Pilipinas nga gipaluyohan ug balaod nga anaa nahimutang sulod sa Davao Norte Sports and Tourism Complex.

Kahinumduman nga ang Sports Academy namugna tungod sa balaodnon nga gipasar ni Congressman Anthony del Rosario diin siya ang nahimong Best Performing Congressman sa ika-16 nga kongreso, sa katuyoan sa pagbansay sa mga batan-ong atleta gikan sa Davao del Norte.

Gipasalamatan gayod ni Gobernador Rodolfo del Rosario ang pagdoble sa gidaghanon sa buot mopailawom sa libreng pagbansay sanglit kini maoy pag-andam kanila nga mamahimong mga kampeon sa sunod nga mga adlaw.

“Moving forward, kada tuig maghimo kita ng Sports Camp para sa atong mga batan-on so that we can prepare them to become future champions. Ang sayop sa ato kung wala ta’y guidance sama niining atong ginahimo, ang mga batan-on nato modula sila bahala na; way nakatudlo sa ila sa mga prinsipyo ug mga rules about the sport ug walay klarong training. So gipahigayon nato kini isip jumping board alang kaninyo nga nangandoy mahimong tinuod nga atleta. Apil sab niini ang tumong nga mahilayo gikan sa makadaot nga mga bisyo ang atong mga kabataan,” matod ni Gobernador del Rosario nga migahin gayod ug panahon alang sa pagbukas sa sports camp.

Ang libre 10-adlaw nga 2016 Summer Sports Camp mag-pokus sa Arnis, Athletics, Chess, Football, Karatedo, Sepak Takraw, Swimming, Table Tennis, Taekwondo, Tennis, Volleyball nga adunay mga premyadong coaches sa matag dula nga magtudlo kanila. Apan ang Swimming kinahanglan himoon sa duha ka hugna sanglit ang pool adunay limite sa gidaghanon nga pagatudloan. (pioDavNor)

Sa gipangutana kung unsa ang ilang gihunahuna nga sulbad sa problema sa bug-at nga trapiko diha sa pantalan atol sa gihimong Candidates Forum niadtong Byernes, Abril 15, gipahayag ni Al David Uy ang mga solusyon.

“The short term and the mid-term solution is talk to ferry companies. In fact ang isa ka company nag 24 hours na, ug ang isa padulong na pod sila sa 24 hours. I think they add more ferries,” matod ni Uy nga nagbutyag nga sa pagka karon, ang mga operators sa mga ferry boats sa Davao-Samal nga ruta mihatag na ug pasalig nga mag 24 oras na sa ilang operasyon.

“But eventually the long-term solution is the bridge connecting Davao to Samal. And I will request Governor Dolfo kung kaluy-an makalingkod ta dire sa Samal, we will request him to sit with our City Development Council as our Adviser and as our Consultant. We need his guidance, we need his wisdom so that all plans by the governor for Samal maplastar. So governor Dolfo will be very soon a resident and will be a full time consultant of Samal,” padayong tubag ni Al David Uy labot sa solusyon sa taas nga linya sa mga sakyanan bisan pa man nga 15-minutos lang ang interbal.

Sa bahin ni kandidato pagka bise mayor Orly Amit, iyang gipasabot nga kinahanglanon na gayod nga madayon ang tulay sanglit daghang problema sa syudad-isla ang mahatagan ug kasulbaran pinaagi sa tulay.

“Daghan kaayong problema nga konektado sa tulay; ang amoang koryente naputol na pod. Pwede kaayo ang koryente isubay sa tulay, pwede ang tubig isubay sa tulay,” rason ni Amit labot sa pagka kinahanglanon gayod sa maong imprastruktura.
Makadaghan nang higayon nga ang syudad-isla nawad-an ug koryente.

Niadtong hinapos nga bahin sa Pebrero, ang
underground cable sa koryente padulong sa Samal nalangkat na usab sa usa ka barko nga miagi sa maong dapit ug niadto lamang katapusan sa Marso miabot ang modular genset nga sa kasamtangan tinubdan sa koryente sa gi-eskedyul nga pagsuga. (pioDavNor)

“Gi-priority nato kadtong mga hayskul kay whole day man gyod ang trabaho,” matod ni Davao del Norte Public Employment Service Office Manager Ms. Gloria Excelsa Pamugas kinsa nagsulti sab sa mga kinahanglanon aron mahimong makatrabaho ubos sa PESO program.

“15 to 25 years old (undergrad), tapos taga Davao del Norte, dapat na-belong sa poor family. Naa man gu’y threshold sa income 118 thousand annually; for 20 days for 317 per day ug karon first time nila ni nga makadawat ug minimum,” padayong saysay ni PESO manager Pamugas.

Matod ni Jay Hoartanida nga nagpuyo sa Purok 6, San Miguel, Tagum City ug nag-tungha sa UM Tagum College nga gikalipay gayod niya ug dako nga nadawat siya nga SPES grantee sa ikatulong higayon.

“I want to earn to sustain my school needs and I want to experience a lot for me to prepare myself for the future,” matod ni Jay nga nagtungha sa BS Accounting Technology ug miangkon nga ang ilang pamilya ubos gayod ug income.

Matod sab sa usa ka fourth year nga estudyante gikan sa Tagum City National Comprehensive High School nga si Mia S. Borlaza nga dako niyang kalipay nga nakatrabaho kay gusto gayod niya nga makahuman sa pag-eskwela.

“Salamat gyod kaayo sa inyong pagtabang sa amoa kay mao ni ang opportunity nga mahuman sa pag-eskwela,” matod ni Mia nga unang higayon nakatrabaho ubos sa SPES.

Matod sa usa ka ginikanan nga si Teresita Alyani nga taga La Union, Mankilam nga suportado niya ang gihimo sa iyang apo nga nangaplay sa SPES sanglit “pait” sab ang ilang pamilya.

“Aron makahuman siya sa iyang kurso labina pait man pod kaayo iyang mga parents, dili bitaw maka afford,” matod ni Lola Teresita nga maoy nagkuyog sa iyang apo nga estudyante sa University of Southeastern Philippines kun USEP.

Ang trabahante-- estudyante nga nakatrabaho ubos sa SPES nga programa, modawat sa minimum wage nga P317 ang adlaw nga ang 60% niini (P190.20) bayaran sa probinsya ug ang 40% (P126.80) ang Department of Labor and Employment kun DOLE ang moabaga.

Gawas nga modawat ug sweldo, ang 141 ka mga SPES grantees ipailawom usab sa usa ka Perfume Making seminar sulod sa mga adlaw nga sila nagtrabaho sa probinsya. (pioDavNor)