Gipakita sa mga departamento sa Probinsyal nga Panggamhanan sa Davao del Norte ang ilang dakong suporta sa programang DavNor KAAGAPAY sa administrasyon ni Kuya Gov. Edwin I. Jubahib pinaagi sa paghimo ug garden sa ilang tugkaran didto mismo sa kapitolyo.

Bisan sa wala pa opisyal nga nalunsad ang DavNor KAAGAPAY o KAwsa sa AGrikultura ug PAnginabuhian sa barangaY, nag-una na ang mga departamento sa kapitolyo sa pag-ugmad sa ilang mga bakanteng luna aron matamnan sa nagkadaiyang gulay aron ipakita sa katawhan nga dali lang himuon ang hangyo sa probinsyal nga paggamhanan sa panguna ni Kuya Gov nga pakusgan ang programa sa malungtarong agrikultura. Kini ang nahunahunaan nga solusyon ni Kuya Gov aron masiguro nga dunay igong suplay sa pagkaon sa probinsya, malungtaron nga panginabuhian sa katawhan ug tabang sa pag-atiman sa kinaiyahan.

Gipasigarbo sa Provincial Economic Enterprise Development Office ug Provincial General Services Office ang ilang “best practices” ug gani sila nakatilaw na sa ilang mga abot. Malipayon usab nga nihataw ang ubang mga opisina sa pag-ugmad sa ilang mga luna, timailhan nga ang urban gardening pwede mamahimong "trend" o uso sa Davao del Norte.