Karon nga nagpabilin kita sa Modified General Community Quarantine (MGCQ), pahinumduman nato ang katawhang Dabaonon nga padayon sa pagsunod sa atong minimum public health standards sama sa makanunayong pagsuot ug face mask, paghugas sa mga kamot gamit ang sabon, pag-maintain sa physical distancing, ug kung mahimo dili lang mugawas sa panimalay kung walay importante nga lakaw.
Mahitungod sa init nga issue karon kabahin sa nanguli nga mga OFWs, gikasubo nato ang ilang nasinati nga kalisud. Mangayo mi ug dispensa kung wala nato naabot ang ilang expectation. Gusto nako klarohon nga kini nahitabo tungod sa kulang nga coordination ug miscommunication tali sa Operation Center sa DavNor ug sa atong mga counterparts sa airport. Wala mi nainform nga aduna diay muabotay nga flight. Ang atong bus alas dos na sa kaadlawon nahuman sa operasyon sa pagpanghatod. Ug tungod kay wala man lagi ta makabalo nga anaa diay muabotay nga mga benepisyaro sa atong Hatid Probinsya program, atoang gipapahulay atong team lakip na ang sakyanan. Alas 6 sa buntag na ta nakabalo nga dunay muabot sumala sa “pag-follow up” sa atong mga counterparts sa airport. Ug tungod kay kadtong panahona ang atong truck lamang ang available, mao kadto ang atong gigamit sa pagsundo kay kaadlawon pa man diay sila niabot ug nakasabot mi nga gikapoy sila ug gusto na gyud nila makauli. Dugang niini, nisunod gyud kita sa standard protocol sa pagsundo ug sa paghatag sa desisyon kabahin sa quarantine.
Pipila na kahigayon nga nahimo ni natong Hatid Probinsya nga programa. Daghan na ang nakabenipisyo niini ug malipayon ang atong mga OFWs ug Locally Stranded Individuals nga nakauli sa ilang banay sa tabang sa atong lokal nga panggamhanan. Ug gani mapasalamaton kaayo sila nato sa atong nahimo para kanila. Apan dili gyud malikayan ang mga aberya kay dili man sa tanang panahon makontrol nato ang mga panghitabo.
Sa panahon karon sa kalisdanan, magtinabangay ug magsinabtanay kita. Dili nato kahadlokan atong mga OFWs, instead, tabangan nato sila nga hapsay ug plastar ilang pagbalik. Tumanon nato ug panggaon atong mga frontliners kay dili lalim ilang trabaho ug sakripisyo nga gihatag alang sa safety sa tanan.
Gamiton usab nato ang social media aron makatabang sa matag-usa kaysa magdinautay ug magbinasulay. Walay bisan usa sa atoa gusto ang nahitabo karon. Busa, magsinabtanay kita ug patas-an pa nato ang atong pasensya. Kung duna moy suggestions, andam ang atong panggamhanan nga maminaw kaninyo apan ibutang nato sa tama nga pamaagi.
Mag-ampo kitang tanan nga unta mahuman na kining pandemia. Padayon kita nga mainampoon ug mapasalamaton nga wala gyud ta pasagdi sa atong Labaw nga Makagagahom. Lantawon nato sa positibo nga paagi ang nahitabo karon sa atong mga kinabuhi. Ug sa kanunay, kita magtinabangay kay kita man, One Davnor, One Team!