Mas gipaluagan pa ug gipadali ang pagsulod-gawas sa mga katawhan sa Davao Del Norte sa pagsuong niini sa Modified General Community Quarantine sugod niadtong Hunyo 1, 2020.

Dili na kinahanglan ang daghang dokumento sama sa quarantine pass ug employment/work IDs aron makalusot sa provincial boundary checkpoints labi na sa nahimutang sa J.P. Laurel, Panabo City. Apan kinahanglan nga mokuha ug Electronic Contact Tracing Card (Quick Response Code) sa pagsulod.

Sumala ni Newwell B. De Ramos, Executive Assistant 2 sa Provincial Governor's Office, nagpadayon ang ilang pagpanghatagsa ikaduhang higayon sa QR Code didto sa Panabo checkpoint. 35 ka mga canopy ang makaplagan kilid sa hi-way aron mapadali ang pagpang-apud-apod.

“Kini atong gipahitabo nga distribution sa QRC is in line with the EO 42 of the governor, in relation sa Electronic Contact Tracing. Para mapadali, efficient, effective (ang) pagpangita ug pagkontak nato sa mga tawo in case nga naay usa ka positive, sample sa usa ka establishment, unya nakasulod… Dili na ‘ta maglisod pag-trace sa mga tao nga naa sa palibot o nahimamat o nakasalamuha sa maong nag-positive sa maong virus, ” matud pa ni de Ramos.

Gawas nga libre, dali ra ang pamaagi sa pagkuha sa maong QRC. Dunay fill-upan nga Contact Tracing Form diin pangalan, address ug contact number lang ang kinahanglang impormasyon. Ipakita usab ang usa ka valid ID isip pagpamatuod. Kung walay valid ID, hatagan gihapon ug QRC human makafill-up.

Sanglit daghan pa ang wala masayod, dungan sa pagtunol sa QRC ang pag-edukar sa mga binansay nga mga staff ngadto sa mga komyuters. Hinuon, kadaghanan kanila nakauyon sa bag-ong sistema labi na ang mga lumulupyo sa silingang barangay, ang Lasang, Bunawan.

Kini ang sinugdanan sa pagpahamtang sa bag-ong sistema sa contact tracing. Sa lima ka mga provincial boundaries sa DavNor, ang Panabo checkpoint pa ang gitutokan sa karon tungod sa taas
nga ihap sa silingang siyudad sa covid-19 positive cases.

Sa mosunod nga mga semana lauman nga mang-apud-apod na ‘sab ang mga LGUs pinaagi sa mga kabarangayan ug mga kapurokan aron dili lang mga langyaw nga mosulod sa probinsiya ang
makadawat, kundili tanang residente sa DavNor.