Bisan pa man naka-schedule ang launching sa DavNor Kaagapay karong June 16, gisugdan na ang pagpanghatag sa mga katawhan sa walo (8) ka mga sitio sa Talaingod ug mga ayudang pang-agrikultura niadtong Martes, Hunyo 2. Sa panguna ni Kuya Gov. Edwin I. Jubahib, gitunol ang 9,900 ka mga semilya sa Mahogany, 15,000 ka mga semilya sa Falcata, 30,000 ka mga semilya sa Cardava, 1,000 ka mga seedlings sa Lubi nga gikan sa Philippine Coconut Authority, 10 ka sako nga semilya sa Camote ug 253 ka mga pakete sa vegetable seeds. Nihatag usab ang grupo sa Probinsyal nga Panggamhanan ug 10 units nga solar panels aron mahatagan ug suga ang mga lumulupyo sa mga ngilit ug bukid nga mga lugar sa Talaingod.

Ang DavNor Kaagapay o Kawsa sa Agrikultura ug Panginabuhian sa Barangay usa ka klase sa bayanihan diin ang matag pamilya, grupo o komunidad hatagan sa ayuda sa mga semilya sa “high valued” nga mga tanom sama sa gulay, saging, falcata, mahogany, sorghum, lubi ug uban pa, ug mga hayop nga pwede alimahan o pasanayon. Tumong niini nga adunay igong suplay sa pagkaon ug dugang kita ang katawhan sa malungtaron nga pamaagi. Sa pagkakaron, ang Probinsyal nga Panggamhanan ang bahala sa pagpangita ug “market” sa abot sa mga tanom ug hayop nga gialimahan ug gipasanay sa katawhan pinaagi sa usa ka cellphone application, ang DavNor Kaagapay app nga gidisenyo sa mga IT personnel sa kapitolyo. Ang katawhan giyahan sa 300 ka mga personahe sa kapitolyo nga gipailawom sa mga training, ug kini sila ginatawag nga mga Barangay Extension Workers nga ma-assign sa tanang barangay sa Davao del Norte.

Giawhag ang tanan sa pagsalmot sa maong programa ug mamahimong Kaagapay sa matag-usa. Kini usa ka lakang nga nagapakita nga ang gobyerno andam kanunay nga mahimong kaagapay sa katawhan, ug nanghiot kini nga ang katawhan usab mahimo nila nga kaagapay sa pagbuhat sa misyon nga mahatagan ang tanan sa hamugaway ug malambuon nga kinabuhi.