SUGDAN na pagtanom ang Sorghum sa lapad nga kabukiran sa Talaingod human sa ceremonial planting nga gipahinabo Martes, Hunyo 2 didto sa Sitio Milaku.

Gipangunahan ni Gobernador (Kuya Gob) Edwin I. Jubahib ang pagpugas sa mga liso nga gikuyogan ni EastMinCom Commander Lt. General Jose Faustino, 10ID Commander Major General Reuben Basiao, DavNor Police Provincial Director PCol Ranie Hachuela ug mga opisyales sa lungsod nga gipangunahan ni Mayor Jonnie Libayao.

“Kung nakit-an ninyo dili na gyera ang gianhi, ang gianhi para tabangan mo magtanom. . . Ang capital ninyo ani kugi. Kinahanglan kugihan mo kay ako magsige’g hatag ug semilya sa inyoha. Hangyo nako sa inyoha kampanyahi ang inyong mga paryente nga kadtong nagpadayon pagrebelde hangtod karon kinahanglan mosurender na kay kung padayon mag-rebelde magka-encounter, mag-gyera, mamatay way premyo, way kwarta. Pero kung mosurender, tagaag panginabuhi, magtanom naay kwarta kuyog pa ang pamilya. Magtinabangay ta,” matod ni Kuya Gob ngadto sa mga IPs nga andam namati bisan pa sa ulan.

Sa wala pa ang ceremonial planting, gipanghatag ni Kuya Gob ang iyang gi-commit nga mga planting materials nga naglakip sa 30,000 ka saging cardava, 10 sako semilyang kamote, klase-klaseng 253 packs gulay; 1,000 coconut seedlings gikan sa Philippine Coconut Authority (PCA), 9,900 Mahogany ug 15,000 ka Falcata para sa walo ka sitio ug sa na-organisar nga Farmers Association sa 56IB nga naka-asayn sa Talaingod.

Atol sab sa ceremonial planting gipasabot ni 10ID commander MGen Reuben Basiao nga sa karon nga pang-gobyerno hiusa ang kasundalohan ug mga ahensya sa katuyoan alang sa kalinaw ug kalamboan.

“Sa una nga mga tuig panalagsa ra ninyong makita ang mga sundalo pero karon ang Local Government Units, government agencies, kasundalohan, kapolisan naa kami karon para sabay-sabay maghatag ug serbisyo sa inyo. Mao ni ang sinsero nga panerbisyo ng gobyerno nyo. Hinaut unta ipadayon nato ang ing-ani klase nga panerbisyo ug sa inyo pod aron ma-achieve, maabot nato ang kalig-on ug kalinaw,” matod sa 10ID commander.

Matod ni Provincial Agriculturist Jose Andamon nga ang sorghum haom gayod sa Talaingod.

“Mao ni ang mga commodity nga nahaom dire sa kabukiran. . . 7 hectares gilimpyohan, mag-ceremonial ta, signal nga magsugod na’g pananom dire sa Talaingod ilabina nga nagsugod na ang ulan-ulan. Importante ni sa mga kaigsoonan dire sa tribo kay “to see is to believe.” Ug makita na nga nanubo ang atong sorghum, naa na ta’y ready nga semilya good for 400 hectares,” matod ni Provincial Agriculturist Jose Andamon.

Ang sorghum nga tanom susama ug kalidad sa mais (corn) apan mas molahutay kini sa panahon nga taas-taas ang init.

Bakiliron (hilly) ang lugar sa Talaingod ug ang contour farming nga pamaagi ang gitudlo sa mga personahe sa Provincial ug Municipal Agriculture Office nga isal-ot sab pagtanom sa Sorghum ang saging cardava ug abaca.