Sugod Hunyo uno, gipailawom ang tibuok probinsya sa Davao del Norte sa Modified General Community Quarantine o MGCQ subay sa Inter-Agency Task Force Resolution No. 40, s. 2020 diin ang probinsya gikonsidera nga anaa sa "low risk" sa COVID-19.

Subay sa guidelines sa IATF Omnibus Resolution, pagasundon gihapon ang minimum public health standards sama sa pagsul-ob sa face mask o personal protective equipment, pag-check sa temperatura, pag-sanitize ug ang social distancing.

Dugang niini, sa labing dali nga panahon, pagahatagan ang mga lumulupyo ug electronic contact tracing card nga adunay QR code aron nga mas mapadali ang pampublikong transaksyon ilabi na sa mga terminal ug checkpoints ug labi na gyud ang mahitabo nga contact tracing kung adunay magpositibo sa COVID-19.

Pagatugutan na usab ang indoor ug outdoor non-contact sports sama sa jogging, running, tennis, badminton ug uban pa lakip na ang mass gathering sama sa mga kalingawan ug importanteng mga tapok apan strikto nga ipatuman ang maximum 50 per cent nga kapasidad sa venue.

Padayon gihapon nga i-implementar ang striktong 50 per cent seating capacity sa mga pampublikong sakyanan apan dili pa gihapon pagatugutan ang mga passenger vans ug air-conditioned nga mga bus nga mubyahe. Ang loading ug unloading sa mga pasahero mamahimo lamang pagabuhaton sa terminal ug dili sa dalan. Wala usab biyahe sa Sabado ug Domingo sa mga bus sa Davao del Norte.

Magpadayon gihapon ang curfew gikan alas 9 sa gabii hangtod alas 5 sa buntag. Ang pagbaligya sa mga ilimnon nga makahubog pagatugutan na usab gikan alas 8 sa buntag hangtod alas 5 sa hapon. Ginadili ang pag-inom niini sa pampublikong lugar ug pagadid-an ang mga tindahan sa pagbaligya ug ilimnon sa mga menor de edad.

Nagahangyo ang probinsyal nga panggamhanan nga mag-amping ang publiko ilabi na karon nga gipaluagan ang lihok sa katawhan. Kung mahimo, magpondo lang gihapon sa sulod sa panimalay kung dili importante ang pagabuhaton sa gawas.