Imbis nga mupahulay sa adlaw’ng Domingo, padayon gihapon sa pagtrabaho ang Probinsyal nga Panggamhanan sa Davao del Norte sa panguna ni Kuya Gov. Edwin I. Jubahib aron masugdan na sa dili madugay ang DavNor Kaagapay o Kaisa sa Agrikultura at Hanapbuhay sa Barangay.

Gibisita sa grupo ang Sitio Tibucag (Sitio KM 31), usa ka ngilit ug bukid nga dapit sa Barangay Dagohoy sa Lungsod sa Talaingod. Aduna kini kapin 160 ka mga panimalay nga halos tanan miyembro sa tribung Ata-Manobo.

Gipahigayon ang konsultasyon tali ni Governor Jubahib ug mga lumulupyo nga girepresenta sa mga Datu ug uban pang mga lideres aron sa mas epektibong implementasyon sa DavNor Kaagapay. Sumala pa sa gobernador, ang mga lumulupyo sa maong sitio pagahatagan ug semilya sa falcata, mahogany, sorghum ug abaca gawas sa mga gulay aron dunay igong suplay sa pagkaon ug dugang kita ang katawhan.

Gipamulong ni Governor Jubahib nga dapat magtinabangay ang gobyerno ug ang katawhan aron nga magmalipayon ug muasenso ang pagpuyo sa matag-usa. Nihangyo usab siya sa mga lumulupyo nga proteksyonan ug tabangan sa pag-implementar sa programa ang mga Barangay Extension Workers nga i-deploy sa Sitio Tibucag.

Sunod nga gibisita sa grupo ang konstruksyon sa demo-farm didto sa Sitio Salawao, Barangay Sto. Niño sa Lungsod sa Talaingod. Andam na usab ang maong pasilidad nga buhian ug mga manok ug uban pang hayop alang sa implementasyon sa DavNor Kaagapay. Sa laing bahin, aduna na pud mga semilya sa mga high-valued crops ug mga kahoy ang anaa karon sa kapitolyo.

Kuaban ni Kuya Gov. sila Mayor Jonnie Libayao ug Vice Mayor Francisco Gipulla Jr., mga pwersa sa kasundaluhan sa panguna ni Col. Nolasco Mempin ang Commander sa 1003rd Brigade, ug mga empleyado sa kapitolyo.